"الوادي" ترصد تعليقات نشطاء الإنترنت على انقطاع الكهرباء: "مناورة لاختبار الأجهزة بتاعتنا حتتحرق ولا لأ"

أثار الإنقطاع المفاجئ للتيار الكهربائي من الساعة الخامسة والنصف صباح اليوم، وحتي العاشرة والنصف، على معظم أنحاء الجمهورية، سخرية رواد مواقع التواصبل الإجتماعي.
"الوادي" رصدت تعليقات رواد مواقع التواصل الإجتماعي الساخرة من الأزمة.
يقول الناشط مالك عدلي "مستني وزير الصناعة أو رئيس الجهاز المركزي للإحصاء يطلع يشيد بمعدل الإنتاج التاريخي اللي حصل النهارده تزامنا مع انقطاع الكهرباء عن مصر".
وتضيف هدي : خسائر بالمليارات ومن جيب المواطنين مباشرة. نحن نعيش مرحلة خراب البيوت. منتهى الاستهبال الحكومى.احنامش زيكم احنا لو لم نعمل نجوع.
ويتابع باسم فتحي: وزير الكهرباء ده لو اتشال هيتشال عشان قال مفيش شبهة جنائية .. يا راجل يا طيب مش في إخوان مخلوقين عشان نشيلهم أي مصيبة تحصل في البلد.
ويشير وائل جمال: فارق الإهتمام بانقطاع الكهرباء عن بعض احياء القاهرة وانقطاعها عن شمال الصعيد كله يكشف جانبا أساسيا من اجرام الاقتصاد والسياسة في مصر.
وقال أحمد خليل: مصر فى حاجة الى رؤوس أموال أجنبية للاستثمار فى مصر.. كيف يقدم مستثمر على ضخ أمواله فى بلد تنقطع فيها الكهرباء بالساعات، الكهرباء والطرق أولا.
ومن جهته قال الناشط تامر موافي "يا إخوانا كلمة "مناورة" مش تهريجة، ده مصطلح حقيقي في مجال شبكات الكهرباء، ما تقفشوش في أي حاجة خليكوا في مفاجئ وروتيني".
يقول "العمدة "أنا فهمت وزير الكهرباء كان يقصد إيه بالمناورة، المعلم كان يقصد مناورة للأجهزة الكهربائية بتاعتنا وبيشوف هل هتتحرق لما الكهرباء ترجع ولا لأ؟.
ومن جانبه يقول الدكتور محمد الجوادي المؤرخ السياسي "لو صح أن الكهرباء انقطعت بسبب فصل 200 مهندس إخواني من الكهرباء، فالأولي أن ترجعوهم وتعتذروا لهم وللمرشد كمان لكن العند يولد الكفر"، ويضيف الكاتب فاضل سليمان ساخراً "بديع والبلتاجي وصفوت حجازي خرجوا من النفق قطعوا الكهرباء ونسيوا يرجعوها، بسبب وعدهم لأحمد مظهر مدير السجن بالرجوع بسرعة قبل ملاحظة اختفائهم بعد ما رجعوا وجدوا السكينة والفيوز في جيوبهم أخ أخ يا ربنا".
وجهة نظر أخرى قالها الناشط السياسي محمد أبو حامد عضو مجس الشعب السابق حيث طالب ب"تنظيف وزارة الكهرباء من عناصر جماعة الإخوان الإرهابية و بشكل حصري هو بداية الحل للأزمة طالما هناك إخوان داخل الوزارة لن تحل أزمة الكهرباء.. يعني إيه إجراء مناورة و صيانة يعطل البلد كلها و بعدين المناورات إللي تعطل الحياة كلها دي مسمعناش عنها قبل كده لا في مصر و لا غيرها من الدول.. متحدث الكهرباء بيقولك عمل روتيني آمال كل الناس مستغربين ليه وبعدين مكنش ينفع تتعمل المناورة في وقت ميعطلش مصالح الناس.. وتسائل مين إللي اختار وقت عمل مناورة الصيانة إللي بتتكلم عنها وزارة الكهرباء؟.. ويختتم ب"المهم إن الإخواني المغفل فاكر إنه في أي مشكلة أو أزمة ممكن تخلي الشعب يترحم على الخائن مرسي والله لو حصل فينا إيه يا إخوان إنتم الشر المطلق".