أحمد ماهر يكتب من محبسه ل«الوادي الإسبوعي»: 13 طريقة مضمونة لصناعة إرهابي أو خائن أو مخرب

من محبسه في مجمع سجون طره ارسل الناشط احمد ماهر مؤسس حركة 6 إبريل هذا المقال والذي يشرح فيه طريقة صناعة الإرهابي والمخرب عبر 13 طريقة قال إنها مضمونة طبقا لوجهة نظره .. ويرى ماهر إن التركيز الإعلامي على اتهام أشخاص بعينهم باتهامات بعينها والاعتقال العشوائي والتعامل العنيف مع المظاهرات وعدم محاسبة الضباط المخطئين من بين هذه الطرق .
1 – اقعد قول عليه ارهابي وإلزق فيه التصنيف ده لمجرد الشك، ونفس الكلام بالنسبة للخاين أو المخرب المحتملين ... إلزق فيهم هذه الصفه واقنع الناس بكده.
2- سخر كل وسائل الإعلام لشتيمته كل يوم وفي كل برنامج ... ارهابي خاين ، أو خاين وعميل.
3- هات خبراء استراتيجيين من على القهوة وخليهم يطلعوا على التليفزيون يتكلموا عن المؤامرات الكونية، خليهم يحسوا بالحسرة على ثورتهم، خلي الشباب يحس بالقهر.
4- اضرب النار على المظاهرات بدم بارد وأوعى تحاسب ظابط .. دي أسرع وسيلة لتحويل أهل و أصدقاء القتيل لإرهابيين، اقتل متظاهر سلمي فيتحول 3 أو 4 من أصحابة لإرهابيين.
5- إعتقل الناس بشكل عشوائي وعاملهم كإرهابيين بدون حقوق .. دي برضه وسيلة ممتازة لتحويل اللي مش إرهابي لإرهابي واللي مش خاين لخاين وهكذا.
6- لا تراعي حرمة بيت أثناء البحث عن مشتبه فيه، نفض لأذن النيابة، ولو حد سألك عن إذن نيابة اضربه بكعب الطبنجة على دماغة، ومايهمكش إن فيه حريم في البيت لوحدهم وادخل كسر براحتك ومايهمكش اللي لسه مالحقتش تلبس حاجة أو تغطي شعرها .. أصلها أم أو اخت أو مرات ارهابي أو خاين أو مخرب ... دي بقى طريقة مضمونة لتحويل كل الجيران والأقارب وأهل المنطقة لإرهابيين فعليين كل همهم الإنتقام من الشرطة.
7- لو مالقيتش الارهابي أو المخرب المحتمل ... اعتقل ابوه العجوز أو أمه أو مراته أو أخته ... كده تأكد انه هايجيلك .. بس احتمال كبير يجي يفجر المبنى وقتها، أو حد تاني يفجر مكتبك بعدها ... مش مهم التفجير .. المهم تظبيط الورق.
8- ضيق عليه الخناق وحل جمعيته وطارده في كل مكان علشان الارهابيين اللي بجد يقعدوا يقولوا له شوفت السايسة واخرتها ايه ... وتأكد انك بكده هاتحول كتير من الشباب اللي كانوا صدقوا فكرة السياسة والتغيير السلمي إلى ارهابيين بجد شايلين سلاح .. أصل كلها محصلة بعضها.
9- أرفض أي حوار أو تسوية وأركب دماغك واقطع أي فرصة للحل السلمي.
10 – بالنسبة للعيال اللي مضايقينك وعاملين دوشة دول، قول عليهم خونة ومخربين واتهمهم بالتمويل، وخلي الصحفيين بتوعك يشتموهم ويشوهوهم كل يوم هتلاقيهم ضموا على الارهابيين رغم انهم مش طايقينهم، وكده تبقى جمعت كل الناس مع بعض، الشامي والمغربي، الاخواني والليبرالي والشيوعي وحطيتهم في وعاء واحد، وكده تعرف تخلص عليهم كلهم .. لو لحقت يعني.
11- خلي عبد الرحيم علي يطلع تسريبات هبلة ، ويطلعها بطريقة إن فيه خيانة وعمالة وتمويل، وخليه يحور في الكلام ويقص ويلزق وخليه يحرض على أهالي الناس المتسرب ليهم مكالمات .. وتأكد إن أول تعدي على أهل الشباب المتسرب ليهم مكالمات هايحول ناس كتير لإرهابيين بجد.
12- استخدم القضاء الشامخ في الصراع السياسي وتصفية خصومك ومن يزعجك، وخلي القضاه بتوعك يدوهم أحكام سريعة ورادعة .. وبكده تخلي الناس تفقد الثقة في القضاء المسيس، والناس طبعاً هاتشيل سلاح علشان تاخد حقها طالما القضاء شامخ قوى كده.
13- خلي الناس تكفر بالسلمية، وسد كل القنوات والمنافذ السياسية على خصومك وطاردهم وحرض عليهم في كل مكان، وخلي أنصار الحكومة يشيلوا سلاح ضدهم، وخلي اللي كان بينظر لمفهوم اللاعنف والكفاح السلمي يندم على اللي قاله قبل كدا... أحمد ماهر ليمان طره