علا شهبة تكشف: ناجي كامل عضو ثوار المعتقل بأحداث ذكرى الثورة.. أول من أقام إذاعة بالتحرير بعد جمعة الغضب

شهبة: ناجى سلموه مخبرين لمواطنين شرفاء لما شاورا عليه ورفيق دربه خالد السيد و قالوا ده بتاع ثورة فاخد 15 يوم
كشفت الناشطة السياسية علا شهبة على حسابها على فيسبوك عن أن الناشط ناجي كامل عضو جبهة ثوار المعتقل في أحداث ذكرى الثورة كان أول من أقام إذاعة بالتحرير خلال ثورة 25 يناير وبالتحديد يوم 29 يناير ثاني ايام جمعة الغضب .. وقالت علا شهبة "زى النهارده – 29 يناير - ناجي كامل عمل بايده اول اذاعه فى التحرير، اذاعة مش مسرح، لسه، اللى هو مسكه برده كمنصة وحيدة 10 أيام، المهم قال يا جماعة الناس بتتمشى وبتلف حوالين نفسها أو بتموت مجاناً و بالزوف عند الداخلية، لازم تناقش،لازم تسمع بعض، لازم تسمع خطاب ما، اقتراح ما، تقسيم مهام مثلا لمساعدة المستشفى، هاتولى أسلاك وسماعات، وعمل البشمهندس الشاطر على فكرة اذاعه بايده واتعلق على عواميد يسحب كهرباء لمشترك من بتوع البيت و هكذا. ..
واضافت علا شهبة والتي كانت إحدى المعتدى عليهم على ابواب الإتحادية من قبل الإخوان " ناجى برضو إلى أغلب الناس كانت بتتمشى و تريح أغلب الوقت وهو واقف على رجله يدير و يقدم و ييسر كلمات الناس على المنصه و بعدين قضاها تشبيك لجان شعبية ببعض لثقة الناس فيه وفى الكوفيه الحمراء ، فمنامش بعد التنحى شهور تقريبا، هو برضو اللى زمايله بيحلفوا انه كان يدخل على اجدعها مدرج فى الجامعه و الناس بترقص و تهرج يخطب فايخليهم ينتبهوا و ساعات يتحركوا معاه".
وروت علا شهبة واقعة القبض على ناجي الذي قام بكل ذلك.. وقالت "بس يا سيدى لاء ابدا ناجى، مفيش ، سلموه مخبرين لمواطنين شرفاء لما شاورا عليه ورفيق دربه خالد السيد و قالوا ده بتاع ثورة فاخد كل منهم 15 يوم سجن حرزوا عربيته وقائمة تهم منها سبحان العليم حيازة قنابل و السير عكسى, أه والله مش بنهرج ، ومنهك وقلقان وصامد ومنور فى الترننج الأبيض،مش مترشح فى المحليات مثلا! يا اللي بتسأل على البدائل، شفت بقى يا ناجي".