أنشأ قناة جديدة على يوتيوب لكشف الحقائق.. تامر عبدالحميد ينضم لقائمة حزب أعداء رئيس الزمالك

دخل رئيس نادى الزمالك فى عداوة جديدة مع تامر عبدالحميد،لاعب النادى السابق والمحلل الفنى على خلفية تعليقات الأخير فى وسائل الإعلام والقنوات الفضائية حول أزمات النادى وطريقة الإدارة فى اختيار الأجهزة الفنية ورحيلها، حيث شهدت الساعات الماضية قيام رئيس القلعة البيضاء بإرسال رسائل تهديد وتوبيخ لعبدالحميد واتهمه بالعمالة وتلقى الرشاوى من ممدوح عباس رئيس النادى السابق.
ونشر عبدالحميد تفاصيل الرسالة التى وصلته من رئيس الزمالك وكان نصها: «أنت زملكاوى، الأهلى خد الدورى بالاستقرار ولا بالحكام ومين ضغط على مين يا أفندى هو مش جروس قعد لغاية نهاية عقده، هو يعنى لو جنش ما أتعورش كان الزمالك أتعادل مع الجونة ولا أتغلب من الأهلى بأخطاء قاتلة من حراس المرمى وأنت مش واخد بالك أن بوطيب المهاجم الأساسى مصاب بقاله شهرين وكهربا هرب يا أخى اتقى ربنا وبطل غل ويا أفندى اللى عمل القايمة قبل ما يمشى خالد جلال .»
ورد لاعب الزمالك السابق برسالة أخرى نصها: «مساء الخير يا سيادة المستشار حضرتك عامل شغل جامد جدًا على مستوى الصفقات كل سنة أحسن لاعيبة بتيجى نادى الزمالك إنما حضرتك بتجيب لعيبة كويسة وخلاص النادى هيستفيد منهم فنيًا إزاى طبعًا ما تعرفش وقلنا إن كتر تغيير اللاعيبة يضر بالفريق زى ما كل شوية هتجيب ماتور جديد لعربيتك فعمرها ما هتمشى، كتر تغيير المدربين لأنه مبيعملوش اللى أنت عاوزه بيبوظ برده الشغل الجامد المعمول شخصيتك أقوى من كل اللى حواليك ما حدش يقدر يعارضك لأن الكل مستفيد ودى مشكلة عندك لازم تلاقى لها حل علشان تاخد الرأى الصحيح اللى يفيدك … وتابع: إدارة فريق كرة القدم حضرتك يا أفندم خبراتك فيها قليلة جدًا ممكن تضحك على الناس كالعادة بتصريحاتك وقلبك للأمور والأوراق إنما حضرتك عارف من جواك أنك مش عارف تدير كرة قدم عارف ليه لأنك بتدير فريق الكرة لمجد شخصى لتاريخك أنت علشان يتقال مرتضى منصور مش الزمالك. نادى الزمالك بالمجهود الجبار المبذول والفلوس المصروفة فيه لازم يبقى فى حتة تانية خالص حرام عليك كده وربنا ميرضاش بكده…. وده الكلام اللى يرضى الله وفيه إتقاء لله .»
ولم يتوقف رئيس الزمالك عن تهديداته لعبدالحميد بعد أن رد عليه برسالة مؤسفة تحمل ألفاظًا قاسية، وتهديد بمنع تامر عبدالحميد من الظهور فى الإذاعة، وبهذه العداوة الجديدة انضم تامر عبدالحميد لقائمة أعداء رئيس النادى من الشخصيات التى يهاجمها بشكل مستمر سواء عبر الرسائل الخاصة أو عبر برنامج الزمالك اليوم فى قناة المحور الفضائية، ما دفع تامر عبدالحميد إلى اللجوء للإعلام البديل، عبر إنشاء قناة خاصة على اليوتيوب، من أجل نشر آرائه وتوثيقها بالصوت والصورة، بعد أن ارتفعت شعبيته بشكل كبير للغاية، على خلفية صدامه مع مرتضى منصور.