بالفيديو..مرتضى منصور ل"إيهاب طلعت":إدى حقوق بث الدورى ل"النهار"ولو ما إدتهاش أنا هديها..وإذا كان بينك وبين علاء الكحكى خلاف على الإعلانات طلع الأندية م اللعبة..وأنا بقول كده وأنا متخانق مع "الكحكى"

طالب المستشار مرتضى منصور، رئيس نادى الزمالك، رئيس لجنة الأندية، رجل الأعمال إيهاب طلعت، رئيس مجلس إدارة شركة بروموميديا، بإعطاء حقوق بث الدورى المصرى لكرة القدم، لقناة النهار، مؤكداً أنه سيبيع حقوق البث للقناة حال امتناع "طلعت" عن ذلك.
وفى مداخلة مع برنامج "صحافة النهار" المذاع على قناة النهار، قال رئيس نادى الزمالك : "محمد كامل رئيس الشركة الراعية لاتحاد الكرة، سيصل الليلة من دبى، وهجيب الأخ إيهاب وهقوله إذا كان عندك خلاف مع علاء الكحكى مالك قنوات النهار على الإعلانات طلع الزمالك والأندية من اللعبة دى".
وأضاف مرتضى منصور : "أنا كلامى واضح، حضرتك يا إيهاب لو مش هتدى النهار حقوق البث، هديها أنا.. أنت بتتخانق على الإعلانات دى قضية، إنما زى ما قنوات تن والحياة خدت حق البث، والنيل للرياضة أخدت، النهار كمان لازم تاخد".
وتابع رئيس الزمالك : "النهار شالت الهم والغم ثلاث سنين والدورى واقع، وتحملت تكلفة بثه دون عائد، اجى النهاردة والدورى قايم أقولها لا مش هديلك.. وأنا بقول الكلام ده وأنا بينى وبين علاء الكحكى مشاكل وقضايا.. يا إيهاب الكلام اللى فى دماغك مش هيمشى، حضرتك مصمم تطلع قناة من المنظومة يبقى طلعنى أنا كمان من المنظومة، واروح ادى حقوق البث براحتى وابيع لدبى أو ابوظبى الرياضية أنا حر".
وقال مرتضى فى مداخلته: "أنت يا إيهاب بتعمل ده علشان تقفل قناة ناجحة وده مش مقبول"، مشيراً إلى أن الشركة الراعية، منحت قناة النيل للرياضة حقوق البث مجاناً. وطالب علاء الكحكى بالاتفاق على بروتوكول لتنظيم حقوق البث، بضمان رئيس لجنة الأندية، ومنحها لكل القنوات الراغبة فى إذاعة مباريات الدورى، طالما التزمت بالشروط.
ووجه رئيس الزمالك حديثه لإيهاب طلعت، قائلاً : "ليه قفل قنوات وخراب بيوت الناس.. محمد كامل معندوش مانع ونجيب ساويرس معندوش مانع فى منح النهار حقوق بث الدورى.. أنت اللى عامل مشاكل دلوقتى".