يشهد الماراثون الدرامي في رمضان الحالي، صراع بين صناع الأعمال الذين يقدمون أعمالا فنية خلال الموسم، وبين زملائهم في المهنة والذين لا يقدمون مسلسلات درامية في الموسم، وذلك بسبب انتقادهم لمستوي الأعمال المقدمة، وهو ما جعل البعض ممن قدموا دراما خلال الشهر الكريم يظنوا أن هذا بسبب عدم تواجدهم، من دافع الغيرة، وهو الأمر الذي دفع السيناريست محمد سليمان عبدالمالك لتوضيح الأمر. وكتب محمد سليمان عبر صفحته الشخصية علي موقع التواصل الاجتماعي توصيحا للأمر، قائلا :" توضيح قد يكون مهما" مشاكل الصناعة تراكمت إلي أن انفجرت وقال : "كل التقدير للزملا اللي تعبوا واشتغلوا في ظروف مضنية عشان يعملوا مسلسلات درامية في موسم رمضان 2019، وهو الأصعب على الإطلاق، ده أمر بديهي ومفروغ منه. بغض النظر عن النتيجة دول يتعمل لهم تماثيل تقديرا على قوة الاحتمال بس" . وأضاف عبدالمالك:" الظاهر إن الظروف الصعبة دي، المتزامنة مع مشاكل بالكوم بين الصناع وبعضهم، مخلية الناس حساسة بشكل أزيد من كل سنة. محدش طايق كلمة سلبية عنه ولا إيجابية عن الآخرين كمان". وأشار إلي :" بشكل شخصي، كون مليش عمل بينافس في الموسم ده مخليني واحد من الجمهور، يعني من حقي أتابع وأنتقد بدون أي غرض". وأوضح :" كل ما أقرا بوست أو تعليق لحد من الزملاء الأعزاء اللي ليهم أعمال الموسم ده، وبيقولوا أصل اللي ما اشتغلوش بيقولوا المسلسلات كلها وحشة عشان ما اشتغلوش في حين إنهم لما كانوا بيعملوا زفت كنا بنسكت لهم، ده بيخليني آخد المسألة على صدري الحقيقة. مش لإن على راسي بطحة، لكن لإني أكيد لو قريت تعليق سلبي عن عمل أنا عامله في موسم ما، ده مش هيخليني أبدا أفتكر إنه صاحب التعليق بيقول كدة لمجرد إنه ما اشتغلش. لو فكرت كدة العيب هيبقى فيا أنا للأسف، وده ليه وصف مش لطيف ميصحش يتقال". وتابع :" طيب، ماشي، تقديرا للظروف دي نسكت ونتجاوز عن السلبيات، ونتكلم عن النقط الإيجابية. ده معناه إننا بنطبل لصحابنا وبننافقهم عشان مصلحة؟ بجد؟ يعني لما نقف جنب الناس ونشجعهم في السيزون الصعب ده نبقى بنطبل، ولما نقول السلبيات نبقى غيرانين وعندنا نقص؟ لازم نحط في بقنا جزمة ونسكت عشان ما نجرحش مشاعر حد لمجرد إننا صناع مش مشاهدين وبس؟ ولا نشكر في حد كمان عشان منبقاش منافقين؟ هل هي دي الأخلاق الحميدة فعلا؟" وطلب قائلا :" الكود الأخلاقي اللي أنا ماشي عليه فيما يخص آداب المهنة، إن لو ليا عمل هسكت، مليش فأنا جمهور. ويا ريت لو ده غلط حد يتفضل ويفهمنا إيه الصح من وجهة نظره. ومع ذلك التعليق السلبي الوحيد ليا على السيزون إن كل مشاكل الصناعة تراكمت سنة ورا التانية لحد ما انفجرت في الموسم ده. وكنت باحاول اخاطب العقلاء اللي فوق يمكن نفوق. وأتمنى التعليق ده ما يكونش ضايق حد لإنه فعلا موجه لرؤوس الأموال أكتر من الصناع وبالتالي لزم التوضيح". وتسائل :" هل نستمر ونقول اللي عاجبنا في الموسم العجيب الغريب ده ولا نسكت في دي كمان احسن ما يتفهم إننا مطبلاتية؟ ماذا تفعل لو كنت مكاني؟؟"
