خوازيق الزوج المصرى

اتجوزتيه عن حب ولا طنط جابتهولك؟ خطفك على حصان ولا اتعرفتوا فى المترو؟ هو موظف تقليدى ولا مرح ومغامر؟
كوووووووووووول التصنيفات دى بعد الجواز بتتسيح وتتبلور فى نسخة واحدة معادة ومكررة فى كل بيت.
متقوليش إشمعنى أخويا مدلع مراته وجوز صاحبتى شايلها شيل، دورى جواهم هتلاقى مجموعة من الخوازيق الموحدة هو أصلًا أوبشن واحد نازل معاهم كلهم
1- الكورة هو يفتح عالماتش ويقعد يقزقز لب وفيشار وسجاير وشااااااااى فيييييييييين الشاااااااااااى يا ست، ولا منه مركز مع الماتش ولا منه سايبك تتفرجى على حاجة عدلة.
2- ييجى يتقدملك واد كده رشيق وشيك وشعره طاير ومهفهف فكك كلها شهرين، شعره يسحب لورا وكرشه يسرح لقدام واسمعى منه بقى الجملة الشهيرة، هو أسبوع واحد دايت وجيم ومش هتلاقيه وهيقولك الجملة دى وهو شافط كرشه.
3- عنده نوبات كرم مفاجئ بتيجى فى غير محلها يعنى ممكن ميكونش فى البيت عشرين جنيه على بعض وتلاقيه مبقشش عالبواب بخمسين جنيه متسأليش إزاى؟ هو كده!!
4- تبقى ليلة سودا ومتعاصة بلك لو حاجة باظت فى البيت، حاجة من اتنين يايقولك هصلحها أنا وساعتها مقولكيش عالخساير، يايقولك استنى هجيب حد يصلحها وإبقى قابلينى!!
5- مستحييييييييييييييييييل ياخد باله إن البيت بقى مصدى ومحتاجين ننجد أو نبيض أو نغير عفش الحاجات دى مش بيحطها فى حساباته هو عنده أولويات تانية أهم متسألنيش أيه هى عشان معرفهاش بس هوكده!
6- ساعات كده يكبس عليه حاجات غريبة فى أوقات أغرب يعنى مثلًا أنا عازم تسعة خمستاشر من صوحابى بمناسبة بلالالالالم واطبخى وكلفى ونضفى ووضبى عشان المحروس يبقى قيمة وسيما قدام صوحابه.
7- ولو انتى بقى طلبتى حاجة لنفسك تبقى مادية وتافهة ومبتقدريش الأولويات اللى احنا برضه مش عارفينها!
8- بيحب ولاده جدا بس بشرررررط ميعملوش دوشة عشان مصدع ميعيطوش عشان بيزهق ميشيلهمش عشان الشياكة هتتبهدل!
9- ممنوع تخرجى مع صحباتك أو تزورى حد تعرفيه بدون إذن أو لوحدك لازم أكون معاكى وأصلًا مبحبش الحاجات دى بس عادى تروحى تدفعى فاتورة الغاز والكهربا ومدرسة الولاد والتمارين والسوق والمرور والشغل لوحدك قشطة يعنى هيجرالك ايه؟!
10- بيبقى شايف إنك بقيتى مهملة فى نفسك وفشولتى واتنيلتى بس مش شايف راجعى رقم 2
وبعد كل ده بيزعلوا لما يقروا إن فى زوجة قتلت جوزها ياشيخة
#بلانيلة