رسالة شاب لحبيبته على الفيس: "نامي بدري ووفري رصيدك ورصيدي"

قال الشاب في رسالته.. عزيزتي البنت المصرية:
تعالى يا بنتي أقولك شوية حجات عنك.. أو هقولك احنا شايفينك إزاى "كرجالة مصريين":
- لما أقولك إني بحبك.. معنى كدة إني بحبك فعلًا، مش لازم كل يوم أقولك إني بحبك، ومش لازم أي مشكلة يبقى معناها إني مش بحبك.. فمش لازم طول الوقت تختبريني.
- أنا مش بيفرق معايا لون الشنطة، ولا لون البلارينا، ولا المونكير، ولا بقيت الحاجات اللي إنتي بتحطيها.. مش لازم تزعلي إني مش فاكر إنتي كنتي لابسة إيه المرة اللي فاتت.. احنا مش بيفرق معانا خالص الحاجات دي.. احنا بيفرق معانا حاجات أهم بكتير.
- مينفعش تزعلي لو سيبتك تخرجي مع أصحابك وتقولي إني مش بغير عليكى.. ومينفعش تزعلي برده لو قولتلك لا متخرجيش "مع ناس معينين" علشان هبقى بحبسك وبتحكم فيكي.
- ساعات ببقى مش طايقك ومش عاوز أشوفك.. عادي أنا ساعات ببقى مش طايق أمي.. بس ده مش معناه إنى مش بحبها.
- ماتثقيش في حد.. كل الرجالة اللي بتشوفك بتتخيلك في أوضاع غريبة غير اللي إنتي بتفكري فيها، من أول أخو صاحبتك اللي في ابتدائي اللي بتجيبيله شيكولاتة وتقوليلوا هتجوزك.. لحد البقال العجوز اللي في شارعكم وبتقعدي تعاكسيه.
- أنا مش ههتم إن شيماء بتغير منك، أو أسماء بتكرهك، أو إن لمياء عايزة تقتلك.. بالنسبة ليا ده كلام فارغ وحوارات حريم.
- مش معنى إني ويتنج (waiting) إني بخونك.. عادي أنا ممكن أتكلم في الموبايل عادي.
- أكيد احنا مش بنتسلق جبال ولا مخترعين ولا علماء أبحاث، فمش ضروري أقولك عملت إيه في يومي.. وتقريبًا مش عايز أعرف إنتي عملتي إيه.
- في الأغلب إنتي مرتبطيش مرة واحدة في حياتك بس، وأكيد مكنش جارك بيحبك لمدة سنتين وبيجيبلك ورد كل يوم.. وأكيد برده مش أقصى حاجة قليلة الادب عملتيها إن في ولد باس إيدك.. قولى الحقيقة وخلاص.. إحنا في مجتمع منحل.
- لما تزعلي تعالى قوليلي أنا زعلانة منك علشان كذا وكذا، وسيبيني بقى أصالحك.. مينفعش تتصلي بيا، وتتكلمى برخامة، فأقولك مالك تقوليلي: "مفيش.. عادى.. مفيش حاجة.. عادى قولتلك"؛ لأني هقوم قايلك اتفلقي.
- متقفليش موبايلك؛ علشان مطلعش عينك وعين اللي جابك.
- بصي احنا الموضوع عندنا زي لغة الكومبيوتر، يا 0 يا 1.. يا أون يا أوف.. معرفش إنتي نظامك إيه.. بس حاولي تخلى الحياة أحلى.
- الشيكولاتة والورد والمراجيح..أكيد مش دي أكتر حاجات بتفرحك، فبلاش تمثيل.
- لو عايزة تغيظي صحباتك.. قوليلي وفهميني علشان أساعدك بدل ما ابوظ الدنيا.
- ما هو لما تبقي عايزة تشتري جيبة، وندخل محل فيه خمستاشر ألف جيبة.. وتقوليلي لا مفيش حاجة عجباني.. يبقى أنا من حقى أتساءل وأقولك "أومال هنلاقي فين؟!!".
- حاولي متسألنيش أسئلة من بتاعت "إنت نمت كويس؟ إنت اتغديت؟"، وتنصحيني نصايح زي "متلبسش خفيف، وبلاش تخرج متأخر"؛ عشان أنا سعتها بشوفك قدامي أمي بالظبط.
- لازم تبقي عارفة إنك بتكلفيني وقت وفلوس وصحة، فأكيد أنا مش بتسلى بيكي.
- يا ريت ما تعمليليش مينشن في صورة بتاعت واحد شايل واحدة، وتقوليلي هنبقى نعمل كده.
- ابقي قوليلي كلام حلو.. أنا بردو بحب أسمع كلام حلو.
- مش لازم توقفيني قدام محل دهب.. وتقعدي تحرقي في دمي.
- وأخيرًا.. نامي بدري ووفري رصيدك ورصيدى.