بقولك أيام سودا !! .. لا فيها حاجة حلوة

ياعم أفر ح أية بقولك أيام سودة .. هوا مش معنى إنها "أيام سودة" يبقى كلو سواد ف سواد .. لا إفرح عيش حياتك.. إسعد نفسك بنفسك .. لا هي إن شاء الله مش سودا هيا حلوة وزي الفل، ودة لإن فيها .. حاجات حلوة كتير موجودة بس احنا اللي مش واخدين بالنا، إن شاء الله خير .. والحال هيتعدل وكلو هيبقى تمام .. بس كل الحكاية شوية تفائل على شوية أمل فى إن بكرة يكون أحلى والحال يتعدل ويكون أحسن من دلوقتي.
كفاية إن فيها إبتسامة من والدك أو والدتك لما تبلغهم بنتيجتك وإنت جايب تقدير كويس أو درجة كويسة، مش فرحتهم بالنتيجة .. لاء .. أكيد فرحتهم عشان شايفينك مبسوط قدامهم، وفي الحقيقة هوا دة اللي بيطلبوه من ربنا على طول .. والدعوة الحلوة اللي بتحب تسمعها منهم وإنت نازل من بيتك.
فيها .. واحد ممكن يحصل معاه مواقف ف مترو أو أتوبيس يخلي كل الموجودين يضحكو من غير ما حد يعرف التاني بس اللي جمعهم الإبتسامة الحلوة اللي على كل وش واحد موجود.
فيها .. أصوات كفيلة إنها تخليك ممكن تقعدك بالساعات تسمعهم من غير ماتحس بالوقت عدى أو حاجة زي .. حليم، فيروز، أم كلثوم، عبد الرحمن محمد، منير، كايروكي وزاب طبعاً .. وبالنسبة بقى للإنشاد الديني زي الشيخ ياسين التهامي والشخ أحمد التوني (الله يرحمه) .. وغيرهم طبعا كتير وكتير.
فيها .. قهوة كبيرة أو استاد بتتجمع فيهم إنت وأصحابك بتقعدو تتفرجو على ماتش، عشان اللحظة الحلوة تفرحو فيها مع بعض، على الرغم انك ممكن تقعد تتفرج علية لواحدك في البيت.
فيها .. شوية صحاب بتقضى معاهم أحلى الحظات اللي بتقعدو تهزر أو بتتكلمو ف أي حاجة\ وبتقعد معاهم أكتر ما بتقعد مع والدك ووالدتك في البيت.
فيها .. الشخص اللي بتحبو واللي اختارتو من مليون شخص لان هوا دة اللي فاهمك كويس وعارف انت بتفكر ف اية وعارف كل حاجة عنك يعني وماتقدرش تاخد خطوة ف حياتك الا لما تستشيرو الأول أو تعرف رأيو الأول.
فيها .. دكتور بيعقدك ف المحاضرات بتاعتو طول التيرم ولابتكون فاهم منو أي حاجة ويفضل خانقك طول التيرم وتشتري الكتاب اللي مش بتفتحو عشان مش فاهم فية حاجة..، وتذاكر غصب عنك وتحضر المحاضرات .. لكن آخر السنة بتلاقي نفسك جايب تقدير كويس في المادة دي.
فيها .. راجل كبير أو ست عجوزة لما تساعدهم ف حاجة مش قادر يعملها لواحدو ويدعيلك "روح يابني .. ربنا يديك زي ما أنت عايز" بس هيا طيبة القلب والبراءة اللي بتسيطر على المواقف اللي زي دي..
فيها .. حلمك اللي إنت شايفو بيكبر قدامك طول ما إنت بتكبر عشان تثبت للعالم كلو وأولهم نفسك إنك قد كلمتك.
فيها .. الشخص اللي بيحبك وخايف عليك وكل شوية يديك ف نصايح عشان بيجبك وشايف فيك أمل وإنك ممكن تبقى أو توصل لهدفك بس لسة خبراتك مش أوي.
لما تعرف إن كل ده فيها ما تبقاش أيام سودة ..إحنا اللي دايماً شايفين الحاجة اللي قدامنا بعين واحدة عشان كدة لازم نقول عليها أيام سودة.