يستيقظ عم بخ من النوم على صوت جرس الباب.. يقوم يفتح يجد صديقًا قديمًا قاطع علاقته به من 3 سنين بسبب انه بيحب النفوذ والتسلط على حساب اى حد وأى حاجة بخ فى سخرية: علاء باشا علاء: أدخل طيب ولا إيه علاء: يا رجل إيه المقابلة دى بعد 3 سنين.. أنا قلت إنك اتغيرت ؟..لسة زى ما إنت (مستهذأ) أقرع ونزهى بخ: ممكن أعرف إيه سبب الزيارة ؟ علاء: وحشتنى يا جدع بلاش توحشنى ؟.. قلت أجى أسلم عليك بخ: غريبة ؟! من إمتى ؟! وبعدين تاعب نفسك وجاى لحد هنا ؟! سهل أوى تبعت حد من رجالتك ياخدونى من مكانى ويجيبونى لحد عندك وإنت قاعد مكانك ع الكرسى مرتاح.. يا يا باشا ! علاء: الكرسى !!! وحشنى الكرسى أوى وأخيرا رجعلى تانى بخ: وهو كان اتاخد منك أصلا ؟ّ هههههههههههه علاء: بضحكات عالية ههههههه: يعجبنى فيك ذكاؤك وإنك فاهم اللعبة كويس بخ فى سخرية: لعبة؟ لعبة إيه ؟! ممكن تكون بالنسبة لك إنت لعبة... لكن بالنسبة لى حلم ونزلنا عشان نحققه... حلم البلد دى تبقى قد الدنيا بجد والشعب يبقى نور عينيكم بجد... ضربتونا وموتونا وسحلتونا وسجنتونا.. وإنتم فاهمين كويس إن إحنا صح. علاء: مين قال لك إنك صح ؟ إحنا اللى صح إحنا اللى فاهمين الدنيا دى تمشى إزاى... إوعى تفتكر إن إنت وشوية العيال اللى معاك هتغيروا الكون بخ: أدينا بنحاول علاء: انتم شوية أغبيا.. وغباءكم ده هو اللى وصلنا للى إحنا فيه ولولانا كان زماننا زى بقية دول الربيع العبرى... والحمد لله إن إحنا مبقيناش زى سوريا والعراق بخ: سوريا والعراق !!.. بقولك أيه يا باشا هو لو ماكنش فيه فساد ومرض وفقر وجوع كان حد عمل ثورة؟... تقدر تقوللى يا باشا كم واحد مش لاقى ياكل.. كم واحد مش لاقى تمن علاج.. كم طفل عنده سرطان.. كم واحد جاهل.. يا باشا احنا مستوى التعليم عندنا بقى الاخير ع العالم علاء: طيب ما ده الطبيعى وده طول عمره موجود بخ: مين قال إن ده طول عمره موجود ؟ انت نسيت مصر كانت زمان ايه ؟ علاء: أأأأأأأه وإنتم جايين دلوقتى تغيروها ؟ بخ: المفروض كنا نستنى لحد امتى ؟ لما تورثوها من فساد لفساد اكبر.. ومن أفعى لأفعى أكبر ؟ علاء: ده كان فى مصلحة البلد بخ: لأ فى مصلحتكم إنتم... بقولك ايه يا باشا.. البلد دى هتتعدل غصب عن أى حد وهنفضل ضد أى حكومة لحد ما تحس بهم.. هتموتونا اتعودنا على كده... هتحبسونا مش مهم.
