ابتهال

كل الملايكة واقفين بسنارة
والطعم نجم
بيصيدوا ناس سهرانه م التفكير
علشان كده بليل توطى النجوم جدا
تصبح على مد العروق
فتحت شباك شقتى من غير وضوء
وبدأ ارتجل الدعاء
يارب خلى الشبع من ابسط الاشياء
_يعنى رجاءاً_
خلى اللى يلمس حد بيحبه....يشبع
خلى اللى يضحك ضحكة من قلبه....يشبع
ارشد نسيم تايه لشباك الغلابه
يسكن فى جوف عيل جعان....يشبع
جتت البشر تبقى سنابل قمح
بدل التراب
خلى الحصى عناقيد عنب
لو دبدب الطفل الرضيع تنزل رطب
يارب خلى الخلق تحضن كل حاجه
واحميها من شر العطب
يارب خلى الحب من ابسط الاشياء
نظرة مابين اتنين فى اتوبيس المنيب
او بنت كعب جزمتها اتكسر
فاداها رجله تمشى بيها مجاز
كل البنات للولاد قصايد شعر
كل الولاد للبنات عكاز
يارب
اكتب على خد الغريب
(صاحب مكان)
اصل الشجر عمره ما فرق يوم ما بين الناس
ضلل على كل اللى عدى من هنا
اوجد ما بينه وبين رصيفه..اُلفه
شيل الحرج بينهم
ياخد دفا منه ان شالله لو سُلفه
لو حن يوم للونس
قول للغريب
يدبدب على راس القبور
يصحى اللى ماتوا م الجفا
من بدء ادم حتى هذا الوقت
يلقى الاحبة اتجمعوا / آلاف آلاف
مش راح يشيلهم ننى عينك حتى لو برّقت
تلقاك شبهم فى الحنين للغيب
والغربة وسط الاهل والاصحاب
كانوا برضه بيلفوا القبور
يمكن يلاقوا
للجنة باب
يا ميتين ناقصين دفا
مش عايز ابقى زيكوا
واصبح لقيط للارصفه
احكولى عن يأس اللى حب بفطرته
واحكولى عن يأس اللى حب بفلسفة