عرض أحد الأشخاص شكوته على الدكتور مبروك عطية، الداعية الإسلامي وعميد كلية الدراسات الإسلامية بجامعة الأزهر سابقًا، قائلًا: "أختي كانت متجوزة واحد في مركز كويس ودنيته كويسة جدًا، وبعد ما أنجبت منه طفلين انفصلت عنه، رغم إنه كان مؤدب ومحترم جدًا، لكنها اتطلقت بسبب علاقاته النسائية".
وتابع السائل، خلال اتصال هاتفي لبرنامج "الموعظة الحسنة" الذي كان يذاع سابقًا على فضائية "دريم": "وكنا عايزينهم يرجعوا لبعض، بعد ما هو عرف غلطته وبدأ يصلح عيوبه، بس هي مش قادرة تتقبله تاني، وبعدها خدتها وروحنا عمرة عشان تفكر في الموضوع وتبعد عن أي مؤثرات، فرجعت برضو رافضة ترجع لجوزها، وبعدين اكتشفنا إنها على علاقة بواحد معاها في الشغل، والشخص دا له سابقة معايا أنا شخصيًا، هو سليط اللسان وأدبه قليل، واحنا عارفينه وعارفنا".
وأضاف: "الفكرة إن الجواز دا مبدأ ومحدش فينا رفض دا حقها، بس احنا بنتكلم في الاختيار مش في المبدأ، والراجل دا لسانه طويل وكل الناس اللي عارفاه عارفين قلة أدبه وقلة ذوقه، وهي كمان عارفة وبتقول، ووصل إنه وقعنا في بعض".
فرد عليه الدكتور مبروك عطية قائلًا: "لا أرى في هذا الأمر إلا المناقشة الهادية. وأنا يهمني إن الراجل دا على خلق واللسان من أول الخلق، لو مسك أختك وغسلها بكلمات سيئة، أختك بالتربية النبيلة بتاعتك دي هتموت، هي هبلة ومش عارفة حاجة".
واستطرد: "اللي بيردح الفولة بتاعته تبقى واحدة بتردح زيه، عشان لو خد بنت ناس محترمة وابتدى في موشح الردح قبل ما يخلصه هي هتموت، لأنها متعودتش على دا، يا إما هتغير هي النظام وتبقى زيه، وهنبقى أشقيناها بأن اكتسبت منه خلقه وصارت زربت اللسان كما أنه زرب اللسان، ويبقى دي خيبة".
ونصح "عطية" المتصل بأن يجري حوارًا هادئًا مع شقيقته لإقناعها بأن ذلك الشخص لا يصلح لها.
وأشار الداعية الإسلامي إلى أنه في حال طُلقت المرأة، ووفت العدة، ثم تقدم لخطبتها عدد من الرجال من بينهم طليقها وأبو أولادها، فبحسب قول الله تعالى: (وبعولتهن أحق بردهن في ذلك)، أي إذا كان هناك حمل، فما بالك إن كان هناك أطفال! – على حد قوله.
وأضاف مبروك عطية: "أبو العيال أولى بالزواج بها ثانيةً، وباقي طابور الخطاب يروح، لأن أبو العيال هيعرف يربي معاها العيال على عكس غيره، بس بشرط أن يريد الطرفان إصلاحًا بينهنا".