لأول مرة.. تامر حسنى يتعاقد على فيلم من إنتاج شقيقة

أعلن الفنان تامر حسني، عن تعاقده لأول مرة على فيلم جديد من إنتاج شقيقه "حسام حسني" الذي دخل عالم الإنتاج مؤخرا.
ونشر "تامر" صورة تجمعه بشقيقه ، عبر حسابه على موقع الصور والفيديوهات إنستجرام ، وعلق قائلا: "الصورة دي والفرحة اللي في ضحكة حسام أخويا لازم أكلمكم عنها، دا حسام أخويا الكبير كان نفسه يدخل عالم الإنتاج الفني من 5 سنين وينتجلي وأنا الحقيقة كنت دايمًا برفض وكان بيزعل مني بس كنت دايمًا بشرحله إنه لازم يدرس السوق الأول".
وتابع:" وميعتمدش عليا ويفهم ويذاكر كتير أوي مش عشان ينتج لا عشان يكون منتج شاطر وفعلًا عمل كدا واستوعب كلامي وبدأ يتفرج ويتابع كل اللي بيحصل من أول فيلم أهواك وتصبح على خير لحد ما شارك بجزء بسيط في إنتاج فيلم البدلة وأشرف على إنتاج ألبومي عيش بشوقك وانتوا أكيد شايفين العملين طلعوا إزاي للناس وإزاي نجحوا والحمد لله".
وأضاف :" كل عمل فيهم في السنه دي حقق نجاح كبير جدًا، أنا في الصورة دي كنت قاعد بمضي عقد أول فيلم من إنتاجه وكان بيقولي (طلعت عيني عشان القعده دي) وأنا كنت بقوله اوعى تزعل مني أنا كنت بعلمك تكون قد المسئولية لوحدك ودلوقتي بأمانة أنت قدها وأنا اللي فخور إنك بتنتجلي عشان شايفك بجد شخص بقى شاطر جدًا ومجتهد وبتفكر صح وشركتك دلوقتي فيها أقوى الأفراد من كل الجوانب".
وإختتم :" وأنا فخور بيهم كلهم فعلًا، ألف مبروك يا حبيبي يا أخويا الكبير ياللي ياما علمتني حاجات جميلة وأنا صغير النهاردة بردهالك من قلبي وبدعيلك ربنا يكرمك ويكرمنا جميعًا ويكرم كل مجتهد وتكمل مشوارك وتنتج ليا ولغيري".
https://www.instagram.com/p/B5XSj2Apczj/?igshid=hsz3dmgtss0k