أحمد سعد ل سمية الخشاب :أنا بحب خطيبتي فبلاش الحركات اللي من تحت لتحت

أعلن الفنان أحمد سعد عن كواليس ظهوره في زفاف "موسى" و"حلاوتهم" ضمن أحداث مسلسل "موسى" وهو الظهور الذي سبب ضجة كبيرة منذ الإعلان عنه من قبل الفنان محمد رمضان بسبب تجربة الزواج السابقة للثنائي أحمد سعد وسمية الخشاب.
ووجه سعد الشكر للفنان محمد رمضان وقال " عايز أشكر صديقي العزيز محمد رمضان انه عزمني في فرحه على سمية وكنت هزعل أوي لو مكنش عزمني في مناسبة سعيدة جدا زي دي، لما كلمني أجي أغني وافقت علطول".
أما فيما يتعلق بردود الأفعال قال أحمد سعد إن المشهد سبب ضجة كبيرة وردود الأفعال كانت مضحكة للغاية وأسعدته كثيرا حتى وإن طالته بسبب علاقته بسمية الخشاب مضيفا " أنا شايف الناس مستمتعة وأكيد استغربوا الموقف أنا كمان استغربت".
أما عن كواليس المشهد قال أحمد سعد إن اليوم مر عاديا وأنه التقى بسمية الخشاب في الكواليس مضيفا "اليوم كان حلو ومر بسلام قابلت سمية وسلمت عليها وسلمت عليا وهزرنا وضحكنا بس فوجئت بأنها قالت على وجودي رزق وجايله.. محصلش أنا روحت بالحب مأخدتش أي فلوس عشان بحب محمد رمضان وليا نجاحات كتير معاه".
وعن الصور التي نشرتها سمية الخشاب بعد عرض الحلقة وأحدثت ضجة لأن الجمهور ربط بينها وبين ظهور سعد قال "بلاش حركات من تحت لتحت هنفضل طول عمرنا نعملها عشان الناس تشوف حاجات وحشة .. لقيتها منزلة صورة وحشة ليا، وأنا مبفكرش بالطريقة دي بفكر بطريقة عملية أنا خاطب دلوقتي وبحب خطيبتي ومعنديش خلافات مع سمية فبلاش الحركات اللي من تحت لتحت".