طفي النور يا بهية.....مشروع النهضة المصرية!!!

النهاردة هنتكلم عن موضوع مهم جداااا بقى بيتكرر معنا اوي بشكل يومي وبقينا نستغرب و نسبح ربنا لو محصلش في يوم... بس طبعا بنبقى عارفين انه هيتكرر تاني لاننا بقينا متعودين على كده!! طبعا فاهمين بتكلم عن ايه اكيد على مشكلة "قطع النور"!!
الشعب المصري بقى لسان حاله دلوقت"دايما شموع...شموع...شموع!!" مفيش بيت ولا محافظة في البلد الا و بيعانوا من المشكلة دي يعني المشكلة عامة عند الكل و بقالها فترة و كبار البلد عارفين بها بس كالعادة ودن من طين و ودن من عجين!!ما دايما حظ البلد دي كده مع حكومتها كله بيوعد وهعمل و اعمل واول ما يوصل للكرسي يفضل يماطل والاخر"انسى يا عمرو"!!
الريس من قبل ما ننتخبه وعد بمشروع نهضة في خلال100 يوم وقال انه اول ما يمسك هيبدأ بتنفيذه يعني خلال 100 يوم بلدنا هتتغير فيها حاجات كتير و عدى اكتر من 100 يوم ولا شوفنا اي حاجة تبشر بالنهضة ولا بأي حاجة هتتعمل.
ولا يمكن النهضة من وجهة نظر سيادته اننا نقعد من غير كهرباء؟؟من ساعة ما الريس مسك وكل همه شعب فلسطين ماشي اخواتنا مقلناش حاجة ...بس بالنسبة لدولة مصر الشقيقة ملهاش حاجة؟؟!!وبالنسبة للشعب اللي انتخبك و فضلك على الفلول مش له حق عليك؟؟
في المانيا بيحتفلوا بمرور 3 سنين على عدم انقطاع النور واحنا في مصر نفسنا يمر علينا 3 ايام واحنا مش مقطوع علينا النور!!!
تعرفوا ان على الفيس بوك بيقولوا على سبيل الضحك يعني ان مشروع النهضة معناه ان لما النور يقطع "تنهض" تولع شمعة!! بس بصراحة لو بصينا حوالينا هنلاقي فعلا ملهاش معنى الا كده!!
يا سيادة الريس كلكم راع و كلكم مسئول عن راعيته وانت يوم القيامة هتتسأل عننا كلنا اودام ربنا اللي بتصلي له هتقوله ايه؟؟هتقوله وعدتهم بحاجات كتير ولما انتخابوني وبقيت الريس كفأتهم بقطع النور يوميا ومش نفذت اي حاجة من اللي وعدت به!!
الاربع سنين هيخلصوا هوا عايزين نحس بأي بادرة للتغير..من يوم ما مسكت والمشكلة دي موجودة ويا عالم هتستمر اد ايه!!
للاعلان عبر موقعنا برجاء مراسلتنا على الايميل التالي:
elgomaaservices@yahoo.com
انتظروا قريبا على موقع الجمعة قسم الخدمات الالكترونية ( سوق السيارات – سوق العقارات – مطلوب عروسة- تفسير احلام – فتاوى دينية – العاب بنات – العاب طبخ – العاب فلاش – العاب سيارات – العاب باربي )