"أصحاب الموهبة مش واخدين حقهم ورفضت دوري في ضرب نار لإن مسلسل الونش عاملي إشباع ".. أبرز تصريحات ميرهان حسين

حلت الفنانة ميرهان حسين، ضيفة ببرنامج " كلام الناس "مع الإعلامية ياسمين عز على شاشة mbc مصر الفضائية، وتحدثت عن كواليس اعتزالها وردود الجمهور وأسباب رفضها لبعض الأعمال الفنية، لذلك نستعرض أبرز تصريحاتها في السياق التالي.
ما السر وراء اعتزال ميرهان حسين

كشفت ميرهان حسين، خلال حديثها عن السبب وراء قيامها باعتزال السوشيال ميديا مؤخرًا وعن شعورها بالحزن وعدم التقدير، ووصفت الوسط الفني ب "الشللية" وعن قلة الفرص على الرغم من كونها ممثلة محترفة وحصلت على العديد من ورش التمثيل.

وعلقت "ميرهان" قائلة:"مكانش فيه موقف معين بس هي كانت حالة إحباط عام وتراكمات حسيت أني مضغوطة جدًا وأني مش مبسوطة ومن غير ما أفكر أو أرتب قولت كده بس بقالي شوية محبطة ووصلت شوية لدرجة الاكتئاب لأني في الاخر بنت عادية جدًا، ممكن اتعب واتضايق واحس بظلم فجالي خنقة خلتني عايزة ابعد عن كل حاجة ومش قصة اعتزال التمثيل للأبد، ولكن كنت عايزة اريح نفسي وابعد شوية عن كل حاجة واعتزل الناس والسوشيال ميديا لفترة محددة".

وأضافت:"قولت اعتزل ما يؤذيك ومقصدتش إن الفن بيؤذيني ولكن حالتي النفسية مكنتش كويسة وحاسة بإحباط وظلم ولذلك قلت هاعتزل كل شيء وليس الفن".

وتابعت: "قفلت تليفوني تماما ومبصتش فيه تماما وقعدت كام يوم أكتر من اسبوع مش بمسك الموبايل ولا بتفرج علي التليفزيون لإني مكنتش منتظرة حاجة تخليني اقطع اجازة الاعتزال، وأهلي مكنوش بيسكتوا وكانوا بينقلولي ردود افعال الناس ولكن الحب اللى وصلي خضني وخلاني ارجع واشكر كل حد من زمايلي واهلي واصحابي والجمهور اللى كتبولي كلمة كويسة فرقت معايا وده حركني واثر فيا وخلاني اشوف ان الصورة مش بس سودة زي ما انت كنت شايفة".

ولفتت ميريهان حسين: "الفن المفترض يخضع لمعايير الموهبة والكاريزما ولكن الوسط الفني في مصر يخضع لمعيار العلاقات بس دي متجوزة منتج أو رجل اعمال أو دول ابناء فنانين، واصحاب الموهبة مش واخدين حقهم".
أثر الحسد على ميرهان حسين

كما كشفت الفنانة ميرهان حسين عن أثر الحسد عليها، قائلة: "أنا نجمي خفيف وفيه ناس عينيها بترشق، ومؤمنة بالسحر والأعمال وتأثيرهم السلبي".

وأضافت :"أنا بخاف على نفسي من الحسد والعين وأنا مؤمنة بكده واكتر حاجتين بخاف عليهم من الحسد ضوافري وشعري".

وتابعت: "الكوافير بتاعي قال لي إن شعرك اكستنشن علشان الحسد لإن فيه بنات بتيجي تتصور معايا ويحطوا ايديهم في شعري علشان شاكين إنه اكستنشن".
سبب رفض ميرهان حسين المشاركة في مسلسل ضرب نار

قالت الفنانة ميرهان حسين عن سبب عدم مشاركتها بمسلسل " ضرب نار " :"رفضت دور في مسلسل ضرب نار مع أحمد العوضي وياسمين عبد العزيز، لأن الدور مكنش مناسب ليا".

وأضافت:"كنت عاملة دور بطولة في مسلسل الونش، واشتغلت علي الدور أوي كفنانة وكان مكتوب حلو وكنت حاسة إن الشخصية عملت لي إشباع معين فكنت حاسة إن دور مسلسل ضرب نار مش هو اللى أحب أقدمه بعد دور نوارة بمسلسل الونش".
سبب رفض ميرهان حسين أغنية توتا فروتا

كشفت ميرهان حسين عن سر رفضها لأغنية ايتن عامر قائلة: "رفضت أغنية توتة فروتا وغنتها أيتن عامر، هي أغنية لذيذة بس أنا كنت عايزة أعمل حاجة تانية وكنت عايزة نوع تاني من الكلام وشكل تاني من الموسيقى، أنا عندي رؤية مختلفة شوية".