"خاص" للفجر الفني تامر هجرس: أنا برجع بقوة، وسبب إنجذابي ل شوجر دادي رسالته الإيجابية

فتح الفنان تامر هجرس صدره للفجر الفني في تصريح خاص عن فيلم "شوجر دادي" متحدث ًعن فريق العمل والكواليس والإيرادات وبدأ حديثه قائلًا:- أنا مبسوط جدًا جدًا بنجاح « شوجر دادي» وما كنتش أتوقع إن هو يحقق النجاح ده كله أنا كنت متوقع إن يحقق نجاح لكن بالدرجه دي حاجه حلوه أوي والحمد لله دا رضا من عند ربنا.


و أستكمل قائلًا:- أنا غبت شويه عن السينما عشان ما كانش معروض عليا حاجات حاسس إنها تليق بالأعمال اللي أنا عملتها خلال الفترة اللي فاتت في تاريخي السينمائي عشان كده ما كنتش مركز في السينما قد ما كنت مركز في التلفزيون ولكن لما اتعرض عليا فيلم «شوجر دادي» كان جميل جدًا وكان هايل وكان لؤي الكاتب هايل ومحمود المخرج ممتاز وإلانتاج كنت متاكد إن هم هيعملوا فيلم كويس وطبعا الكاست والكرو جامدين جدًا.


و أضاف أيضًا:- النجمه ليلى هائله جدًا بحبها ودوري اللي جذبني ليه أنه لذيذ وحاجه حلوة أوي والمفاجأه اللي هتحصل في الآخر دي الفيلم نفسه خفيف ومسلي ولذيذ وفي فكر وفي رسالة إيجابية حلوة أوي ده اللي شديني للفيلم وكان لؤي وهو بيكتب الشخصية كان عارف إن تامر اللي هيعملها فكانت لايقه أوي عليا فحسيت إن أنا ممكن أدخل حاجات من تامر نفسه في الشخصية ودي من الحاجات اللي شدتني أيضا للدور.
فيلم شوجر دادى

وتدور أحداث فيلم "شوجر دادي" في إطار كوميدي حول الأب بيومي فؤاد الذي يقوم بإبلاغ أبنائه حمدي الميرغني ومصطفى غريب برغبته في الزواج من امرأة ثانية، فيما ترفض ليلى علوي احتمالية أن ترى زوجها مع امرأة أخرى، وتحاول إعادته عن تفكيره.


يعد فيلم "شوجر دادي" التعاون الثاني لليلى علوي وبيومي فؤاد وحمدي الميرغني بعد فيلم "ماما حامل" الذي عرض عام 2021، وحقق وقتها إجمالي إيرادات 4 ملايين و359 ألفا و324 جنيها.

فيلم "شوجر دادى" تأليف لؤى السيد وإخراج محمود كريم وبطولة ليلى علوى، حمدى الميرغنى، بيومى فؤاد، مى الغيطى، فرح الزاهد، محمد محمود، مصطفى غريب وجوهرة وتامر هجرس عدد آخر من الفنانين، ومن ضيوف الشرف هشام عباس الذى يقدم أغنية أيضًا خلال الأحداث، ومروان يونس وسارة الدرزاوى.