عايدة فهمي ل "الفجر الفني": توقعت نجاح "سوق الكانتو".. وهذه كواليس المسلسل (حوار)

خطفت الأنظار بدور الأم الطيبة التي تحب أبنائها وتفضلهم على كل شئ، وهذه ليست المرة الأولى التي تخطف فيها الأنظار بدور تقدمه في مسلسل فسابقًا خطفت الأنظار في دور الأخت الحكيمة التي تنصح أخيها وتقف بجانبه في أي ظرف بحياته، وهي الفنانة القديرة عايدة فهمي التي قدمت دور وصايف في مسلسل "سوق الكانتو".

وكان ل "الفجر الفني" نصيب للحوار مع الفنانة عايدة فهمي عن دورها في مسلسل "سوق الكانتو "وكيف استعدت له وعن كواليس العمل مع المخرج حسين المنباوي والفنان أمير كرارة.

عايدة فهمي
وإليك نص الحوار:-

1-حدثينا كيف تم ترشيحك لدور وصايف في مسلسل سوق الكانتو ؟

تم ترشيحي من قبل الأستاذ المخرج حسين المنباوي وشركة سينرجى وانا اشتغلت معاهم العام الماضي في جزيرة غمام.

2-كيف أعددتي نفسك لشخصية وصايف؟

استعديت للشخصية من خلال قراءة الورق، وأول يوم تصوير اتناقشت مع المخرج حسين المنباوي واتكلمنا في شخصية الأم الشعبية الطيبة اللي بتحب ولادها وحنينة ولكنها قوية وبتحافظ على حقوقهم ودي ملامح الشخصية اللي اتفقت عليها مع الأستاذ حسين المنباوي ومن خلال ده بدأت اشتغل على الورق ومواصفات الشخصية.

3-حدثينا عن كواليس العمل مع الفنان أمير كراره والمخرج حسين المنباوي ؟

المخرج حسين المنباوي اشتغلت معاه السنة اللي فاتت وأنا عرفته كمخرج وهو عرفني كممثلة فأصبح في ثقة متبادلة بينا، أستاذ حسين مخرج كبير أو ي أو ي وأهم ميزة فيه أنه بيحب الممثل الكويس الممثل اللي قدامه شاطر هو بيكون سعيد بيه جدًا وبيبدع معاه.

"أمير كرارة النجم الكبير أنا أول مره طبعًا اتشرف وأكون جنبه هو نجم كبير بكل المواصفات والمقاييس أنا حظي كان هايل جدًا جدًا أني اشتغل مع نجم كبير زيه وكمان مي عز الدين.

وأخلاق أمير كراره في اللوكيشن روعة لأنه شخص إبن ناس ومحترم وبيحب زمايله بيقدر الكبير واللي حواليه بيهتم أوي بشغله وتفاصيل شغله وبيذاكر مع زمايله وهو بنجوميته دي بيقعد يذاكر ويحفظ وبيقعد يساعد زمايله هو في كل مواصفات النجومية انا كنت سعيدة جدًا اني اشتغلت السنة دي النجم الكبير أمير كرارة.

سوق الكانتو
4-السؤال اللي شاغل بال الناس كلها من أول عرض المسلسل صالح هيرجع أو لا ؟

صالح رجع في الحلقة ال 20 بدأ يظهر ونستني نشوف الأحداث هتحصل فيها ايه والناس تشوف بنفسها، بس مش حابة احرق الأحداث هو صالح رجع بس هنشوف ايه اللي هيحصل في الحلقات الجاية.

5-هل توقعتي نجاح المسلسل بالشكل ده وأنه يتصدر التريند منذ عرض أولي حلقاته؟

توقعت نجاح المسلسل لأن كل عوامل النجاح متوفرة من اول شركة الإنتاج الكبيرة سينرجي، والمخرج الكبير حسين المنباوي لأنه معروف عنه أنه مخرج كبير وان دائمًا النجاح معاه في كل خطواته، وطبعًا الأساتذة الكبار نجوم المسلسل كل الممثلين اللي ف المسلسل كبار جدًا ومحترمين جدًا واسماء كل اسم فيهم يشيل مسلسل لوحده وطبعًا ده الأستاذ المخرج وشركه الإنتاج أنهم مختارين العناصر دي اللي هي مفيش كلام أنها تعمل نجاح مؤكد للعمل.


6-ما رأيك في تصرف شحاته في المسلسل.. وماهي رسالتك لمن يتصرفون مثله؟

طبعًا هو تصرف وحش جدًا ومش محتاج أننا نقول لأنه معروف، كل واحد لازم يحكم ضميره وبعدين النتيجة عند ربنا بتبقي معروفة لأن محدش بيأكل مال حد وبيمشي بيه سليم لإنه بيترد له في الدنيا والآخرة ف كل واحد يحكم ضميره والناس كلها عارفة الصح من الغلط.

7-هل تعتقدين أننا بحاجةلتقديم مسلسلات تاريخية تتحدث عن معالم مصر من أجل الجيل الجديد حتى يتعرف ويستفاد على البلد؟

طبعًا ياريت نعمل مسلسلات تاريخية بتتكلم عن بلدنا وتاريخنا القديم والحديث أتمني ده من كل قلبي.
8-ما رأيك في المسلسلات القصيرة التي تتكون 10 أو 15 حلقة.. هل نحتاج أن نقدمها أكثر من 30 حلقة؟

الدراما إذا كانت لا تحتمل أكثر من 10 أو 15 حلقة ليه نمطها ل 30 حلقة، وفي مسلسلات تحتمل أن تكون 30 أو 60 حلقة كمان والدراما تحتمل ده والناس متزهقش وتفضل متابعة وعندنا أمثلة من ده كتير ف الدراما المصرية.
9-هل تنجح المسلسلات أكثر في السباق الرمضاني أم خارجه ؟

المسلسل بينجح في أي وقت لو بتتوفر فيه عناصر النجاح..واعتقد ان المسلسل الكويس بيبان أثناء عرضه في رمضان وبعدين بيحقق نسبة مشاهدة عالية بعد رمضان

10-ماهي المسلسلات التي تتابعيها في رمضان في وقتك الفاضي؟

"للاسف مش لاحقة اشوف حاجة.. بعد رمضان بقي ان شاء الله".

11- قبل رمضان قدمتي مسلسل وبينا ميعاد وكل الناس أُعجبت بشخصيتك في المسلسل حدثينا عن دورك؟

"وبينا ميعاد "مسلسل ناجح في كل عناصره والشخصية كانت مرسومة حلو قوي علي الورق والناس حبيتها قوي...انا كنت مستمتعة جدا وانا بعمل الدور ده.

12-قدمتي أدوار متعددة خلال مسيرتك الفنية ما أقرب عمل لقلبك؟

أقرب شخصية إلي قلبي هي شخصية مليحة غي جزيرة غمام.

شخصية مليحة