عصام عمر: "دخلت التمثيل بعد رحلة كفاح.. ومكنتش عايزهم يقولوا عليا الواد بتاع الإعلانات"

حل الفنان عصام عمر، والمخرج عمر المهندس والمؤلف أحمد عاطف وأبطال مسلسل "بالطو" الذي حقق نجاح كبير في الفترة الأخيرة في ضيافة برنامج "معكم منى الشاذلي"، والمذاع عبر فضائية "CBC" وبدأ كلًا منهم في الحديث عن دوره خاصةً أن أدوراهم جميعًا مشابهه للواقع بشكل كبير بشكل ساخر.

عصام عمر يتحدث عن بداياته

تحدث عصام عن بداياته قائلًا: "أي حد عايز يعمل حاجه لازم يتعب عشان انا عايز حاجه معينه فتعبت، انا جيت القاهرة اعمل كاستنج واعلانات في البداية ومكنتش عايزة استمر عشان متحرقش لاني كان هيبقي اسمي الولد بتاع الاعلانات".

وتابع: "أنا بعافر بقالي كتير وسافرت أمريكا وكنت بسافر مع اصحابي مع فرقه مسرحية ونعمل شغل هناك وبنروح مهرجانات وبنعمل عروض مسرحية ومره رجعت وقولت عايزه اعمل حاجه أكبر ومش هينفع أفضل كدة واستلفت فلوس عشان أعرف أشتغل، أنا روحت معرفش أي حاجة هناك وفضلت أدور على شغل كتير وكانت فتره صعبه فعلًا".



عصام عمر يتحدث عن بداية اختياره للدور

وتحدث عصام عمر عن اختياره للدور وقال: "مكنتش حابب اعمله ومكنتش عاوز ابقا البطل وقولتلهم شوفوا حد اشطر مني ومشهور أكتر هيفيدكوا وده عشان عمر المهندس المخرج صحبي وأنا كنت عاوز اول تجربه ليه تنجح فمكنتش حابب ابوظله المسلسل فقعدت معاه وقعدنا ندور علي ممثل اشطر مني ومشهور عشان يعمل الدور بس هو قالي محدش هيعمل الدور ده غيرك".

أصل فكرة ترشيح أبطال المسلسل

تحدث عن ترشيح أبطال المسلسل وقال:" الموضوع جه إن أنا وسلافه وعصام ومريم كنا اصحاب اصلا في الجامعة وبالذات سلافة لإن أنا إلى شرحتها لفيلم الجزيرة 2 ف في بينا شغل من زمان، ولما جت الفرصة جه في دماغي صحابي وحبيت انتهز الفرصة دي إني أظهرهم للجمهور".
وأضاف: "ومكنتش قريت الكتاب بتاع عاطف فكنت عايزه وأتكلمنا وقولنا إن أحنا عايزين نعمل حاجات ليها وسط ونهاية وفيها دراما لغاية ما وصلنا واشتغلنا اننا نبني قصه ومش عايزين نهزر بزياده فيها، احنا هنعتمد فيها على كوميديا الموقف زي مثلا أن دكتور لسه متخرج مبيعرفش يولد لازم يولد واحدة في الوحدة الصحية حالًا".
أحمد عاطف يكشف عن حقيقة حكايات المسلسل

وتحدث المؤلف أحمد عن حكايات المسلسل الكوميدية والمواقف الساخرة وكشف أن بعضها مأخوذ عن قصص وحكايات حقيقة بالفعل وبعضها حدث معه بشكل شخصي حيث أن شخصية عاطف تشبهه قليلًا ولكنه أضاف حبكة كوميدية لتناسب المسلسل وحاول تغيير بعض الأحداث والأسامي حتى لا تمس أصحابها الحقيقين
وقال: "جزء كبير من مسلسل محاكي للواقع، أنا أتخرجت بقيت مدير الوحدة ومكنتش فاهم أي حاجة ومكنتش متوقع إلى هيحصل معايا ده انا كنت لسه بمتحن فجأة لقيت كده".
ورد ساخرًا بعد سؤال منى الشاذلي عن حقيقة وفاة مدير الوحدة كما حدث في المسلسل وقال: "مدير الوحدة مماتش في الحقيقة لكنه نقل وسابني لوحدي أول ما استلمت فموته في المسلسل انتقامًا منه".
تفاصيل مسلسل "بالطو":

ويذكر أن مسلسل "بالطو" مأخوذ عن رواية " بالطو وفانلة وتاب" للكاتب أحمد عاطف، وتدور أحداثه في إطار كوميدي حول مهنة الطب ومعاناة الأطباء حديثي التخرج، والعمل مكون من 10 حلقات ويتم عرضه عبر منصة watch it، ومن إخراج عمر المهندس.
أبطال مسلسل "بالطو":

ويشارك في بطولة المسلسل عدد من النجوم وهما عصام عمر، محمد رضوان، محمود البزاوي، عارفة عبدالرسول، محمود حافظ، سلوى خطاب، محمد لطفي، مصطفى أبوسريع، سامي مغاوري، مريم الجندي، ومن تأليف احمد عاطف، إخراج عمر المهندس.
الجدير بالذكر إن مسلسل بالطو ينضم إلى نوعية مسلسلات المنصات ويتم عرض حلقتين منه" كل أربعاء على منصة "واتش ات"، وتصدر التريند أكثر من مره بعد عرضه.