سميح ساويرس بعد حصوله على الجنسية السويسرية الفخرية: "مش باسبور..وفخور إني مصري"

علق المهندس سميح ساويرس، رئيس شركة أوراسكوم للتنمية، على حصوله على الجنسية السويسرية الفخرية، قائلًا "كنت بهزر معاهم في سويسرا وبقول فين الباسبور السويسري لكن قالولي دي حاجة ودي حاجة والاهم عندي التقدير المعنوي في الموضوع".
وأضاف "ساويرس" في حواره عبر تطبيق زووم مع الإعلامية لميس الحديدي ببرنامج "كلمة أخيرة" المذاع على فضائية "أون" اليوم الأحد: "موضوع الباسبور سهل لأي رجل أعمال هيستثمر فلوسه في بلد ممكن يقدم طلب الحصول عليه لكن أنا من أول يوم قلتلهم في سويسرا أنا كده كويس مش محتاجه وأفضل أكون أجنبي هنا وانتوا مرحبين بيه وحابينه عن إني أكون سويسري نص نص لأننا مصريين في النهاية ومواعيدنا مش مظبوطة".
وتابع "المواطنة الفخرية ليست معناها الحصول على الباسبور السويسري لأنه معناه الجنسية وأنا سعيد أني مصري ولا أحتاج إلى جنسية أخرى، ولكن المواطنة الفخرية عبارة عن شهادة تقدير وبوكيه ورد ولا أي حاجة تانية لكن المعني المعنوي كبير وهي أني بعد 16 عامًا من قدومي إلى سويسرا كمستثمر فيعتبر ما حصلت عليه تقدير وفخر بي وكأنهم بيقلولي: كأنك مواطن زينا أهم عندهم من الباسبور ".