"تريزيجيه" مفتاح الفرج

أهم حاجة في تحقيق حلمك إنك متسمعش لحد يحبطك، فيه قصة مشهورة أوي بيقولك مرة شوية ضفادع ماشية في الشارع ضفدعتين منهم وقعوا في حفرة.

الضفدعتين حاولوا يطلعوا ومش عارفين.. يحاولوا ومش عارفين.. المهم الضفادع اللي فوق فضلت تقول مش هتعرفوا تطلعوا خلاص سلموا أمركم لله..

ضفدعة سلمت أمرها وماتت.. الضفدعة التانية فضلت تحاول .. فضلت تحاول لحد ما طلعت..

عارفين طلعت لية؟ علشان مكانتش بتسمع! وفاكرة ان الضفادع اللي فوق بيشجعوها علشان تطلع.. وعلشان كدة طلعت..

بداية الفشل هي انك تسمع لصوت الناس اللي حواليك اللى بتقول كلام يكسرك.. ناس مش فارق معاهم نجاحك.. كلام عكس قناعاتك كلها.. بتهد كل اللى بتحاول تبنيه..

مش بس الكلام هو اللي ممكن يعطلك، بس ممكن تلاقي في طريقك شوية مطبات .. شوية حاجات صغيرة ممكن تهد كل اللى انت بتعمله، عارف المطبات دي تعطلك آه .. تكسرك لأ! المطب ده بيكون طريق نجاحك.. علشان بتعرف الطريق شكله عامل إزاي.

تعرف الممثل محمد رمضان كان كاتب إيه جوه اوضة نومه ؟ كان كاتب على الحيطان مقولة لبرنارد شو بتقول "البحر الهادئ لا يصنع بحارا ماهر" .. يعني الحياة السهلة عمرها ما تصنع عبقري.

المستكشف إرنست شاكلتون كان بيقول "الصعوبات مجرد أمور موجودة من أجل التغلب عليها في النهاية"

الأهلي قرر في سنة من السنين انه يدمج كل فرقتين من الناشئين مع بعض.. بمعنى أن مواليد 94 يلعب مع مواليد 93 وهكذا..

فريق 94 كان بيضم محمود تريزيجيه وكهربا وناس تانية .. اما فرقة 93 كانت بتضم أحمد حسن كوكا ورامي ربيعة..

المهم المسئولين عن قطاع الناشئين ساعتها قالوا هيختاروا 5 لاعبين من مواليد 94 علشان يلعبوا مع 93.. وكان من ضمنهم تريزيجيه..

تريزيجيه كان بيلعب مع الفريق اللي أكبر من سنه .. وعلشان كدة مكانش بيشارك نهائيًا فضل 4 سنين مش بيلعب خالص.. بس فضل صابر..

مسئولين القطاع قرروا إنه يمشي من الأهلي لدرجة ان فيه ناس من قطر كانت عايزة تجنسه وتلعبه في الدوري هناك ..

رغم إنه كان هيتكسر ألا إنه فضل صامد .. فضل واثق في نفسه وفي إمكانياته.. فضل حاطط قدامه هدف واضح.. مش هيمشي من الأهلي ألا وهو نجم النجوم..

مسك الفرقة علي ماهر وقال للاعبين كلهم ينزلوا الملعب سواء كانوا هيمشوا او هيقعدوا وقرر أن تريزيجيه لازم يكمل..

علشان يكمل ويبقى تريزيجيه..

تصدق أن تريزيجيه ملعبش مع ناشئين الأهلي ألا 6 ماتشات بس.. وطلع للفريق الاول علشان جوزيه كان شايف فيه النجم..

الله يمسيك بالخير يا جوزية..
الصبر بيولد نجم ..
أوعى تيأس ..
أوعى تتسرع ..
ياما ناس اتسرعت فتداست..
صدق اللي قال ان الصبر مفتاح الفرج...