الحلال بيهدد سعادتي

كيف حالك استاذة نيفين انا محتارة في مشكلة ونفسي الاقي عندك الحل اللي مصيري ممكن يكون متوقف عليه .. المشكلة باختصار اني مخطوبة لراجل كويس جدا واحنا علي وفاق والحمد لله لكن انا كان سبق ليه الزواج ولم اوفق وانا حاليا مطلقة من حوالي سنتين .. اتعلقت بالراجل دة واظهر حسن نيته في الارتباط بية بشكل جاد وانا وافقت لكن في الحاح منه علي اننا نمارس الحياة الجنسية قبل كتب الكتاب بحجة اننا لازم نكتشف هل احنا علي توافق في الموضوع دة ولا لا .. بصراحة في الاول انا رفضت واضايقت منه جدا وشبه اتخانقنا لكن هوة ما بطلش محايلة واصرار وانا دماغي بدات تميل ناحية الفكرة لكن جوايا حاجة بتقولي لا اوعي تعملي كدة .. ومش عارفة ليه حاسة ان العلاقة نجاحها واقف علي الموضوع دة .. ومحتارة جدا هل اوافقه لاننا كدة كدة هنتجوز ولا ارفض ويمكن اخسره .. ياريت لو الرد يكون في اسرع وقت وشكرا جزيلا
فضفضة
محررة الصفحة .. نيفين حجازي
اكيد اكيد ما تاخديش الخطوة دي ابدا .. هل فكرتي في انه راجل مش طيب النية بسبب الطلب دة ؟ بعدين لما انتوا هتتجوزوا ايه لازمة تعملي حاجة في الحرام وانا شايفة ان حجته في اختبار نفسكم في حاجة زي كدة ملهاش غير معني واحد انه مش حريص ولا خايف عليكي لانه المفروض هوة اللي يقوم بالحفاظ عليكي حتي من نفسه .. من وجهة نظري .. الراجل دة من الاساس لازم تقومي بعمل تقييم له من اول وجديد لانه بالمنظر دة بيخون الامانة ومش معني انه سبق ليكي الجواز انك تكوني مشاع لافكار صبيانيه ولا اخلاقية وحرام .. وانتي غلطانة في حق نفسك انك تخلي نجاح العلاقة متوقف علي سبب زي كدة .. انتي بتظلمي نفسك جدا .. طبعا ارفضي بكل ثقة وكبرياء انتي من بيت وبنت ناس ومن الاهانة ليكي انه يفكر من ناحيتك بالشكل دة اصلا .. ليه تديله الفرصة انه يشوفك في المنطقة دي ويكون تقديره ليكي من خلال علاقة جنسية ازاي تقبليها علي نفسك .. بعدين هوة لو راجل محترم وجد ويخاف ربنا عمره ما كان هيقترح عليكي دة .. بالعكس انتي تخافي علي نفسك معاه وعلي مصيرك بعد ما تتجوزيه .. شوفي يابنت الناس مافيش احسن من الاصول بما يرضي رب العالمين والصح واضح والغلط اوضح .. امشي بما يرضي الله في حياتك تكسبي دنيا واخره وارجوكي ما تنساقيش ورا مشاعرك وعيدي تقييم الراجل دة من تاني وفي اسرع وقت لانه غير امين عليكي وغير محل للثقة ابدا .. ارجوكي تراجعي نصيحتي يمكن يكون فيها راحتك وامانك .. تحياتي ليكي وشكرا علي ثقتك
للتواصل اضغط هنا