انت مهذب بزيادة

السلام عليكم استاذة نيفين
السلام عليكم ورحمة الله و بركاته أستاذتى الفاضلة المحترمة
أنا عندى مشكلة محتار فيها حقيقى و هى أنى اتعرفت ببنت طبعا عن طريق أحد أصدقائى و مشكلتى هى أن البنت دى بتقول أنى مؤدب بزيادة لدرجة تحس فيها أنى مش بأتعامل على طبيعتى مع أنى أصلا طبيعتى كده و النهاردة حصل بيننا موقف الصبح أنى اتصلت بها لأنها كانت مسافرة و لسه راجعة القاهرة النهاردة , بأقولها صباح الأمل و التفاؤل ردت قالتلى اييه شغل فلان ده ( اسم شخص معين ) أنا قولتلها لا والله مش شغل فلان قامت هى تقولى أصل فلان كان بيقولى كده و لما أتعصب يقولى بس اهدى اهدى أنتى بدأتى
المهم أنا هى كانت راكبة المواصلة اللى هتوصلها بيتها أنا قولتلها لما ترجعى البيت رنى عليا , المهم رنت عليا لما وصلت البيت قبل ما تطلع و أنا قولتلها كان فييه كلمة حابب أوضحها ليكى , أولا بخصوص كلمة انتى قولتيهالى الصبح اييه شغل فلان ده , أنا والله ماأعرفش أن فلان ده كان بيقولك كده ثم دى كلمة تعلمتها من حد عزيز عليا و تعلمت أنى أنشر البهجة و أنى أقابل الناس بابتسامة لما اشوفهم خصوصا على الصبح
المهم هى قالتلى مافيش حاجة تستاهل و قولتلك قبل كده بطل تتأسف على حاجات انت ماعملتهاش , و أنا اللى كنت فاكراك هتقولى حاجة مهمة و خطيرة , المهم انا قولتلها و معلش حصل خير و هى قالتلى أنا دلوقتى هأطلع البيت و أنام شوية علشان بقالى 3 أيام مسافرة و مطبقة مانمتش و لما أصحى هأكلمك و أنا قولتلها حصل خير و هى تمام حصل خير و قفلنا على كده بس أنا حاسس بحاجة كده , هل أنا كنت أوفر أو لانى باخاف على زعل الناس أبقى أوفر و خصوصا لو كنت مهتم بأمرهم و بأخاف تطلع منى أى كلمة تزعلهم
ولا تجرحهم بدون قصد, كمان حاسس أنها كده قفلت منى ولا أنا غلطان ولا اييه بالضبط بس و الله انا طبعى كده أنى مش بأكون عاوز حد يزعل منى و أفضل أتأسف على حاجات بأفتكر أن الناس فهموها غلط و على حاجات مش بتكون أخطائى أصلا , هى ماعملتش بلوك من الواتس بس حسيت أنها تضايقت من الطريقة الأوفر دى أو يمكن افتكرتها أوفر و راحت قالتلى أنها هتنام و لما تصحى هتكلمنى , أنا بقى متضايق علشان حاسس أنى زودتها معاها , تفتكرى حضرتك أنها كده قفلت ولا بس متضايقة شوية ولا اييه بالضبط و لو كده أعمل اييه علشان أرجع تانى هى لا تتضايق منى و كمان أعمل اييه علشان هى ماتكونش شايلة منى و لا خلاص مابقتش تطيقنى , تفتكرى حضرتك بلاش أكلمها الا لما هى تتكلم ولا أعمل اييه بالضبط , أنا حقيقى محتار , أه قبل أن أنسى الصبح قولتلها لييه ماأخذتيش تاكسى قالتلى لأن فلوسها خلصت و عرضت عليها قولتلها لو كنت أعرف كنت جييت أخذتك من الموقف بتاكسى بس هى قالتلى مش مستاهلة والله قولتلها والله بأتكلم بجد
المهم قالتلى يعنى كنت هتسيب شغلك و تييجى قولتلها ماأنا كنت هأجى بتاكسى كنت هأروح الشغل بتاكسى أيضا بس المهم خلصنا القصة دى و نهينا هذا الموضوع
دلوقتى انا فىمشكلتى الأساسية و هى أعمل اييه بعد الموقف اللى حصل ده و قالتلى فييه هتدخل تنام دلوقتى و لما تصحى هتكلمنى , عموما أنا محتاج رد بأقصى سرعة ممكنة يا أستاذة / نيفين أرجوكى
فضفضة
محررة الصفحة .. نيفين حجازي
استاذي الفاضل .. في رايي ان حضرتك مندفع زيادة تجاه البنت دي وفي الوقت نفسه هيه مش مهتمه بنفس الدرجة تجاهك .. وده اللي حضرتك مش حاسس بيه ومش واخد بالك منه .. الحكايه مش حكايه انك بتهتم بالناس وبس .. فيه حاجات تانية مهمة لازم تاخد بلك منها وهية ان فيه بنات مش بيحبوا الراجل المندفع بزيادة او المهتم بزيادة او بمعني ادق بيحبوا اللي يعذبهم شوية .. هتستغرب من كلامي بس فيه ناس كدة .. ودة واضح جدا من طريقة رد فعل البنت اللي بتحكيلي عنها في رسالتك .. در فعلها بياكدلي انها من النوع دة .. خليك تقيل .. او خليك بعيد .. وشوف واتفرج هيكون رد فعلها ايه .. والله لو هية بادرت باي تصرف مرضي بالنسبة ليك خير وبركة لكن لو عكس كدة يبقي مفيش داعي من الدخول في العلاقة دي لاني مش حاسة انكم النموج المناسب لبعض .. لانك تركيبة مختلفة عنها .. ردي عليك دة ارجو ما يكنش محبط لكن الفرق في طبايعكم واضح جدا من البداية مش محتاج تدقيق .. ارجوك تراجع نفسك لانك هتتعب في العلاقة دي خصوصا ان ردود البنت عليك مفيهوش اي مراعاة بشكل عام لاهتمامك بيها وفيه لهجة استهانة .. فكر كويس ورد علية وراجع نفسك مرة واتنين وتلاتة .. مرسي علي رسالتك وشكرا علي ثقتك وانا اتشرفت بيك صديق لفضفضة ومستنية ردك تقولي عملت ايه بشكل اخير .. تحياتي .
[email protected]