كلمة في سرك مش ده اللي تحط فلوسك فيه

فيه كتير منا لما بيجي يشتري أي جهاز كهربائي في البيت بيحاول ميستخسرش عشان الجهاز ده "يفضل مكمل العمر كله" زي ما بيتقال، أكيد مفيش حاجة بتقعد العمر كله، بس فيه فرق ما بين حاجة تقعد معاك سنة وحاجة تقعد معاك 10 سنين. نفس الكلام بالنسبة للموبايلات، لما أغلبنا بيجي يشتري موبايل بيحاول يختار موبايل هيكمل شوية معاه ولو لكام سنه. ومن هنا بتيجي المشكلة اللي هتخليك تقول:
" أدفع فلوس كتير علي موبايل قوي من إصدار براند كبير ولا أدفع في المعقول علي موبايل فيه مواصفات عادية ولا هل ينفع اني ألاقي موبايلات بمواصفات عالية وبسعر مش عالي ولا هو قليل قوي؟!"
اه، تقدر تلاقي موبايلات إمكانياتها عالية وسعرها في المتوسط. وعلى فكرة مش كل الموبايلات الغالية جامدة في مواصفاتها، ومش بنقول بكده ان هي وحشة، لا، لكن في موبايلات تانية تقدر تجيبها زيها أو أحسن منها في المواصفات وبأقل من تمنها اللي ممكن يوصل للنص.
وعشان كده احنا جايبنلك أهم موبايلين اللي هتلاقي اللي أفضل منها بكتير وبنص سعرها، وهم من إصدار شركة ابل اللي معروف عنها إن إصدارتها مواصفاتها كويسة لكن أسعارها عالية قوي.
iPhone 7

iPhone 7 اللي سعره دلوقتي بيوصل ل 12,374 جنيه مصري واحد من الموبايلات اللي متحطش فلوسك فيها مش عشان هو مواصفاته مش كويسة لكن عشان سعره مبالغ فيه زيادة عن اللزوم حتى بعد أما مر سنة على إصداره.
أنا منتظر منك انك تقولي "طيب، ايه البديل؟"

هتلاقي ان مثلا Sony Xperia Z5 زيه تقريباً في مواصفاته ويمكن كمان يكون أفضل منه في بعض الإمكانيات، فوق ده كمان سعره أقل منه بكتير، فهو بسعر 7,399 جنيه مصري.
أما عن مواصفات الجهاز الأخير، فهو بيجي بشريحة اتصال واحدة وبهيكل مقاوم للمية والتراب زي iPhone 7، شاشته أفضل من شاشة الأخير لأنها أكبر فهي حجمها 5.2 بوصة وبجودة 1920 × 1080 بكسل وكثافة 428 نقطة في البوصة لكن iPhone 7 بيجي بشاشة حجمها 4.7 بوصة وبجودة 1334 × 750 بكسل وكثافة 326 نقطة في البوصة، والشاشتين محمين من الخدوش. أما عن مساحة التخزين الداخلية فالأفضل فيها iPhone 7 عشان هي بحجم 32 أو 128 أو 256 جيجابايت لكن Sony Xperia Z5 مساحة تخزينه 32 جيجابايت بس، وده علي الرغم من ان مساحة التخزين الخاصة بالجهاز الأول مش قابلة للتوسع عن طريق كارت ذاكرة خارجية لكن التاني بيقبل التوسع ل 256 جيجابايت، يعني من الأخر اللي نقص هنا اتعوض هنا. الرامات 3 جيجابايت في Sony Xperia Z5 لكن 2 جيجابايت في iPhone 7.
نيجي عند الكاميرا وهنلاقي ان iPhone 7 مميز بس في إن الكاميرا الخلفية بتدعم خاصية التثبيت البصري اللي بتخليك تلقط كل حاجة حتي لو كنت بتجري وانت بتتلقطلك الصورة، لكن هتلاقي إن الدقة أحسن في Sony Xperia Z5، ده عشان كاميرته 23 ميجابكسل علي عكس التاني اللي بدقة 12 ميجابكسل بس.
أما البطارية فهي أعلي في سوني فهي سعتها 2900 مللي أمبير لكن في iPhone 7 سعتها 1960 مللي أمبير بس.
iPhone 7 Plus

على الرغم من أن iPhone 7 Plus من أفضل إصدارات شركة ابل لكن هو بردو من أغلي الموبايلات اللي موجودة في السوق وده الطبيعي من شركة ابل، فسعره في السوق دلوقتي 16,374 جنيه مصري.
وعشان كده، احنا بنقترح عليك انك تشوف Samsung Galaxy S7 اللي مش هيجي بمواصفات أعلي لكن زيها يعتبر، وحتى لو هتلاقي حاجة أقل في الإمكانيات مش هيبقى الفرق ساعتها كبير ما بينهم، وطبعاً انت هتلاقي السعر أقل بكتير فهو سعره 9,999 جنيه مصري.

أما عن مواصفات Samsung Galaxy S7، فهو بيدعم شريحة أو شريحتين حسب الإصدار لكن iPhone 7 Plus بيجي بشريحة واحدة بس. الموبايلين جسمهم مقاوم للماء والتراب لكن Samsung Galaxy S7 بيقاوم لمدة ولمسافة أطول بتوصل ل 1.5 متر.
الشاشة بقى علي الرغم من إنها أكبر في iPhone 7 Plus عشان حجمها 5.5 وحجم الشاشة في Samsung Galaxy S75.1 بوصة لكن الجودة أعلي في شاشة التاني، فشاشته بجودة 2560 × 1440 بكسل وبكثافة 577 نقطة في البوصة لكن الأول شاشته بجودة 1920 × 1080 بكسل وبكثافة 401 نقطة في البوصة. الشاشتين بردو محمين من الخدوش.
الرامات في Samsung Galaxy S7 أعلي 4 جيجابايت لكن رامات iPhone 7 Plus 3 جيجابايت بس، أما عن الذاكرة الداخلية فهي بتيجي أعلى في Samsung Galaxy S7 فحجمها 32 أو 128 أو 256 جيجابايت لكن التاني حجم مساحة التخزين الداخلي 32 أو 64 جيجابايت لكن هو بيقبل التوسع ل 256 جيجابايت عن طريق كارت ذاكرة خارجية.
الكاميرا اللي متفوق فيها iPhone 7 Plus عشان هو جاي بكاميرا خلفية مزدوجة دقتها 12 ميجابكسل، واحدة فيهم بتدعم خاصية التثبيت البصري ده غير ان فتحات عدساتهم مختلفة، لكن كاميرا التاني واحدة بس وبدقة 12 ميجابكسل، لكن الجميل هنا انها بتدعم خاصية التثبيت البصري، فهتلاقي إن النتاج اللي طالع من كاميرا سامسونج رائع بردو.
بطارية Samsung Galaxy S7 سعتها 3000 مللي أمبير لكن بطارية التاني سعتها أصغر 2900 مللي أمبير، والاتنين مبيتشالوش من الموبايل نفسه.
ولو حابب تتعرف أكتر علي مواصفات الأجهزة دي بشكل مفصل أو علي مواصفات موبايلات تانية أصدرتها شركة ابل أو سامسونج أو سوني أو أي شركة تانية خش علي تطبيق MobiHub، فتقدر من عليه تتعرف مش بس علي امكانياتهم لكن كمان أسعارهم ومميزاتهم وعيوبهم عن طريق الشرح المفصل اللي مع كل جهاز وكمان ممكن تقارن ما بين مواصفات كذا جهاز مع بعض، كل اللي عليك انك تختار الموبايل وتكتبه في خانة البحث وهيظهرلك كل اللي يخصه، أو ممكن تخش علي Mobihall أو Mobiles Gate اللي هيزودوك بمقالات عن أي حاجة ممكن تيجي في بالك عن الموبايلات والتكنولوجيا الخاصة بيهم.