ليه تشتري موبايل صغير لما ممكن تشتري موبايل كبير؟!

"ليه تشتري موبايل صغير؟"
"طب ليه أشتري موبايل كبير؟!"
سؤال منطقي ومهم انك تسأله وإجابة السؤال ده عندك انت _ اه مش عندي_ عشان ببساطة انت اللي عارف انت بتستخدم موبايلك في ايه، يعني مثلا لو انت بتستخدمه بس كوسيلة اتصال مش هيبقي مهم انك تجيبه كبير فساعتها الحجم مش هيهمك لكن لو انت بتحب الألعاب مثلا أو الفرجة علي الفيديوهات علي اليوتيوب أو التقليب في صفحات النت فأكيد ساعتها انت هتحتاج الموبايل يكون حجم شاشته كبير عشان يبقي مريح وانت بتلعب، والراحة هنا مش بس في التفاصيل اللي هتشوفها علي الشاشة لأ وكمان في فكرة ان ايديك هتبقي مرتاحة وانت بتلعب.
ومن هنا جه دور المقال ده عشان يساعدك في انك تعرف أفضل موبيلين شاشاتهم كبيره، بطاريتهم تستحمل البهدلة فيها، المعالج بتاعهم قوي وطبعا مش هننسي الرام ومساحة التخزين الداخلية الخاصة بكل واحد فيهم اللي لازم تكون كبيره عشان تخزن براحتك عليها كل الألعاب اللي بتحبها، يعني من الأخر هنقولك أفضل موبيلين مناسبين للألعاب موجودين دلوقتي بالسوق.
Samsung Galaxy S8
Samsung Galaxy S8 من الموبايلات الأخيرة اللي أصدرتها شركة سامسونج السنة دي، وهو يعتبر من أفضل الموبايلات اللي في السوق حاليا اللي مناسبة ليك في اللعب، أصل هو بيحتوي علي شاشة كبيره حجمها 5.8 بوصة تقدر تشغل أي لعبة عليها بعرض الشاشة عن طريق الإعدادات، والشاشة الممتع اللي فيها انها واخدة حجم الواجهة الأمامية للجهاز بنسبة 83.6%، الشاشة من نوع اموليد المعروفة اللي بجودة HD الرباعية اللي معناها انها بجودة 1440 × 2960 بكسل وده معناه ان هي أربع أضعاف جودة الشاشات العادية ال HD، وعلي فكرة كل ما بيزيد عدد البكسلات في الشاشة معناها ان التفاصيل هتبقي واضحة أكتر مش في الألعاب بس لكن في كل حاجه.
Samsung Galaxy S8 المعالج بتاعه بيختلف حسب الإصدار، ففي إصدار بمعالج Qualcomm Snapdragon 835 وإصدار تاني بمعالج Samsung Exynos 8895 والاتنين خلينا متفقين انهم بيخلوا الجهاز أداءه قوي من كل الجهات حتي في سرعة شحن البطارية اللي أكيد هتبقي بالنسبالك ميزة وانت بتلعب بشكل كبير أثناء اليوم، وأداء المعالج جنب 4 جيجابايت رام هيشغلك الألعاب بجرافيكس رائعة بدون أي مشاكل.
بطارية الجهاز سعتها 3,000 مللي أمبير اللي تعتبر مناسبة جنب أي معالج من اللي ذكرناهم قبل كده عشان ترمي علي الجهاز أي لعبة انت عايز تلعبها بدون قلق، أما بالنسبة للمساحة التخزين الداخلية بتوصل ل 64 جيجابايت وهي بتقبل انها تتوسع عن طريق كارت ذاكرة خارجي اللي بيوصل حجمه ل 256 جيجابايت.
الموبايل بردو بيستخدم خاصية بيطلقوا عليها اسم Game Launcher اللي بتساعد علي تعطيل الزرار الرئيسي بتاع الموبايل وانت بتلعب عشان متخرجش من اللعبة بالغلط واللي بردو بيقدر يحفظلك اللعبة عند المستوي اللي وصلتله لو عايز تقفلها في أي لحظة وانت مثلا فاتح الفيس بوك، والخاصية بردو بتساعد علي انها تظهرلك الألعاب اللي انت بتستخدمها كتير من بين الألعاب المتثبتة أصلا في الموبايل، ويمكن تكون الخاصية دي من أهم الحاجات اللي مخلية تجربة اللعب علي Samsung Galaxy S8 مميزة.
ولو عايز تتعرف أكتر علي مواصفات Samsung Galaxy S8
اضغط هنا
Samsung Galaxy S7
يمكن يكون المميز في موبايل Samsung Galaxy S7 ان سعره أقل من سعر Samsung Galaxy S8، وهو مش بس سعره رخيص لكن بردو المميز فيه انه فيه مواصفات تخليه من أفضل الموبايلات المناسبة للألعاب من بعد Samsung Galaxy S8، فهو جاي بشاشة حجمها 5.1 بوصة من نوع اموليد ومعالج Qualcomm Snapdragon 820 ورامات حجمها 4 جيجابايت، وده معناه أن الألعاب اللي مليانة بالجرافيكس هتتشغل علي الجهاز بشكل سلس وسهل بدون استنزاف للبطارية اللي بتيجي بسعة 3000 مللي أمبير، ومع اللعب الكتير علي الجهاز مش هتلاقي بسهولة الجهاز بيسخن منك وبكده تقدر تركز في اللعب بس من غير تهنيج أو أي عنصر تاني يشتتك.
الجهاز بيدعم بردو الفولكان (واجهة برمجة التطبيقات) اللي بتخليك حاسس بروعة التأثيرات الخاصة بأي لعبة انت بتلعبها، وبيدعم بردو خاصية Game Launcher اللي بتجمع كل الألعاب اللي موجودة علي جهازك في مكان واحد، ومن عليه تقدر قبل اللعب تكتم أو تخفي التنبيهات الخاصة بالجهاز وتقدر بردو تلعب في الإعدادات عشان توفر الطاقة وتوجهها للعب بس.
Samsung Galaxy S7 بيدعم بردو أدوات أخري للعب Game Tools بيها تقدر تسجل فيديو للعبه، تاخد سكرين شوت للعبة، تصغر الشاشة وتعطل الأزرار الخلفية والرئيسية.
أما اللي يخص المساحة الداخلية فهي بتوصل لحجم 64 جيجابايت اللي بتقبل بردو انها تتوسع عن طريق كارت ذاكرة خارجي حجمه بيوصل ل 256 جيجابايت، وبكده تقدر تنزل كل الألعاب اللي تعجبك.
ولو عايز تتعرف أكتر علي مواصفات Samsung Galaxy S7
اضغط هنا

ولو حابب تتعرف أكتر علي مواصفات موبايلات تانية أصدرتها شركة سامسونج أو أي شركة تانية خش علي MobiHub، فتقدر من عليه تتعرف مش بس علي امكانياتهم لكن كمان أسعارهم ومميزاتهم وعيوبهم عن طريق الشرح المفصل الي مع كل جهاز، كل اللي عليك انك تختار الموبايل وتكتبه في خانة البحث وهيظهرلك كل اللي يخصه، أو ممكن تخش علي Mobihall أو Mobiles Gate اللي هيزودوك بمقالات عن أي حاجة ممكن تيجي في بالك عن الموبايلات والتكنولوجيا الخاصة بيهم.
https://yaoota.com/ar-ae/
https://yaoota.com/ar-sa/