التصرف بعقلانية

هناك شخص يحتوي خطيبته ويعاملها كالطفلة البريئة دائمًا، وهي تعترف بذلك، فقلبه الحنين عليها يجعلها تعشقه، وترغب في الحديث معه طوال الوقت، حدثت معهم مشكلة تصرف فيها الشاب بعقل وحكمة لثقته الزائده فيها، وللحفاظ عليها من عيون الآخرين، وإليكم القصة بالتفصيل:
روى الشاب ما يلي "أنا خاطب من 6 شهور وبحب خطيبتى جدًا وقريب هنتجوز، من حوالي شهر جالي ماسج على الفيس من أكونت Fake فيها صورة لخطيبتي بشعرها ولابسه بيچامة بيت ضيقة ومكشوفة، طبعًا أول ما شوفت الصورة كنت هتجنن وثورت ومكنتش عارف افكر، مسكت الفون كنت هكلمها، لكن الحمدلله تراجعت ع اخر لحظة، هديت وحاولت افكر بعقلي، ولما فكرت لقيت انه اكيد اللى بعتلي الصورة دى حاجة من الأتنين يأما واحدة صاحبتها منفسنة منها، أو واحد حاطط عينه عليها، وف الحالتين اللى بعتلى الصورة قاصد إنه يعمل بينا مشاكل ونفسخ الخطوبة".
واستكمل الحوار "كلمتها وقولتلها انى عايزة اشوفها، رحت قابلتها وجبتلها معايا ورد، وكلمتها براحة خالص ورتلها الصورة، طبعًا اتكسفت واتوترت وبدأت تعيط، هديتها خالص وطمنتها، وقولتلها اهدى انتى وانا هتصرف ووعد منى انا هحلها وهردلك كرامتك من اللى عمل كده، مشينا، واول ما روحت البيت نزلت بوست بمدحها فيه وبقول انها احلى حاجة ف حياتى، اولًا عشان اديها ثقة ف نفسها وأكدلها ان اللى حصل ده مغيرش اى حاجة، ثانيًا عشان أبين للشخص اللى عمل كده ان خطته فشلت، فيبدأ يتصرف تصرفات مش محسوبة، فيغلط ويتقفش، وده بالفعل اللى حصل، الصورة دى كانت ع موبايل خطيبتى، متصوراها ف البيت عادى بلبس البيت زيها زى اى بنت بتحب تتصور بهدوم البيت وبشعرها، واكتشفنا ان واحدة صاحبتها خدت الصورة من ع موبايلها وبعتتهالى عشان توقع بينا لانها غيرانة منها، طبعًا اتصرفت ف الموضوع وردتلها كرامتها زى ما وعدتها، واول مقابلة لينا بعد ما الحوار اتحل، جبتلها لاب توب، وقولتلها".
وأضاف لها قائلًا "مش هقدر طبعا أقولك متتصوريش واخنقك واقيد حريتك، اتصورى براحتك خالص، بس طالب منك طلب صغير، بعد ما تتصورى انقلي كل الصور على اللاب وامسحيهم من على الفون خالص، عشان الفون ممكن يضيع او يتسرق او غيره، أنا مش ملاك ولا مثالي، أنا بس حسيت إنى كنت صح أوووى ولو لمرة واحدة بس في حياتي، متتخيلوش علاقتنا إزاى قويت بعد الموقف ده، كبرت في نظرها وفي عينيها أوووى، وفي نظر نفسي كمان، حسيتها بعد الموقف ده بتعاملني كأني جوهرة بين اديها، حاجة كده زى نعمة من ربنا، بتحافظ عليها أوى".
واختتم كلامه "على فكرة سهل إنك تكون راجل مع اللى بتحبها سهل تطمنها وتحتويها وتسندها وتخاف عليها وتراعى ربنا فيها، ولو عملت كده مش ممكن تتخيل هتحبك وتتشعبط فيك إزاى، حسسها بس إنك ف ضهرها لو كل الدنيا جت عليها".