رحاب منيعم تكتب: الأسطورة بتقول .. إحنا بنشتري راجل‎

الأسطورة بتقول احنا بنشتري راجل..لكن الحقيقة بتقول اننا بنشتري راجل وشقة ومهر وشبكة ونيش وصالون وسجاد صالون وسفرة وسجادة للسفرة ونجف للسفرة وهدايا عيد الميلاد ،وعيد الأم وعيد ميلاد الأم وحفيد الأم..وعروسة مولد وهدية عيد الفطر وعيد الأضحي..وشم النسيم "اللي هي ايه معرفش" بس اكيد مش هتدخل علي نسايبك في شم النسيم وايدك فاضية!
المهم إننا مبنشتريش راجل ابدا ..إحنا بنشتري الراجل اللي هيقدر يشتري كل اللي فات ده .. واللي مينفعش نتنازل فيها عن حاجة واحدة من الليستة اللي أطول من برج الجزيرة ، أو حتي نشتريها أقل من اللي جابتها ريم بنت خالتها أو شيرين صاحبتها أو حتي صافي صاحبة جاراتها!
الأسطورة بتقول اننا حافظين الأمثال حلو أوي وبنسمع شعارات كويس أوي لكن ساعة التطبيق بنقلب فيها أحفاد العيلة المالكة اللي لازم نجيب طقم صالون المدهب بتاع المرحوم لويس وطقم الصيني اللي ماضي عليه بونبارت بعد ماساب الحملة ومسكهم طبق طبق يمضي عليهم!
احنا كدابين اوي وعارفين اننا كدابين ومش فالحين غير في الشعارات اللي بنطبقها علي غيرنا لكن علينا احنا لاء نقلب ماري منيب في فيلم حماتي ملاك
الغريب إن الستات لما ابنها هو اللي بيبقي العريس التعيس تلاقيها بتشتكي لطوب الأرض من عروسة ابنها اللي مبتبطلش طلبات لا هي ولا عيلتها وتعد عليها العزومات والخروجات والدباديب والبرفانات والشرابات اللي المحروس ابنها بيجيبهم، ومتسيبش جارة ولا فارة الا لما تحكيلهم عن طلبات أهل العروسة وابنها اللي مبيدوقش النوم ياكبد امه علشان يلاحق علي طلباتهم وشروطهم.

لكن وقت ما المحروسة بنتها تبقي هي العروسة الننوسة يبقي ياختاااااااي العريس بخيل وعيلته بخيلة ونرصله في الطلبات ونعدله في الهدايا ونحكي ونتحاكي ع اليوم الأغبر اللي دخل عليهم في عاشورا من غير مايجيب للمحروسة هدية واستخسر فيها حتي 6 كيلو حلويات شرقي من العبد
وبعدين تعالوا هنا قولولي..صالون إيه اللي انتوا عايزين تجيبوه ومتمسكين بيه اوي كده وكأنه شرط من شروط الجواز .. هو في حد اصلا لسه بيزور حد ولا انتي فكرك إن الموكوسة بنتك هتسيب طقم الصالون كده للضيوف،مانتي عارفة وهي عارفة إن مصيره بياضات ب200 جنيه من العتبة وخلصت علي كده...
ونيش ايه اللي انتي عايزة تجيبيه علشان ترصي فيه 30 طقم خشاف و20 طقم جيلي ده غير طقم الصيني اللي هتحرج علي جوزها انه حتي يتصور جنبه..
بنتك لاهتعمل خشاف ولاهتجيب جيلي ..المكسرات وياميش رمضان ده بئه تاريخ وعدا ولا انتوا متعرفوش الاسعار؟!
وطقم الصيني اللي بتقعدي تحوشيلها فيه من يوم ماتتولد هتركنه وتجيب مكانه 12 طبق ب90 جنيه من الي بيتباعوا علي العربيات..وصواني التيفال اللي انت قاعدة تعديهم هيكونوا أهم أسباب طلاق بنتك بعد خناقة انت جرجت الصنية التيفال ياعصام "
خفوا الطلبات شوية ..لاء خفوها اوي..والنيش والصالون اللي هيتكتبوا في القايمة مش هما الجواز ولا هما اللي هيفرحوا بنتك ويأمنوا مستقبلها علشان لو اتجوزت الجوازة الغلط هتسيبله النيش والصالون وهدومها وتطلب الخلع ويمكن تدفعله فوقهم فلوس علشان تخلص و شقة بنتك مش متحف الشمع علشان تطلعي عين أبوها صرف علي التحف والأنتيكات..
علموا بناتكم واولادكم واصرفوا علي تعليمهم ..فرحوهم وهنوهم بدل ماتحوشوا لجوازاتهم ..علشان لما يختاروا يختاروا صح..ومتبقاش الجوازة شوية عفش ونفرش البيوت ونعمرها غم
والأسطورة بتقول إننا فعلا وحتما ولازم نشتري راجل