النيش.. الأول حاولت ادور في دماغى على معنى للكلمة دى بس دماغى رفضت تستجيب.. غُلب حمارها زى ما بيقولوا.. اشمعنى دى الحاجة الوحيدة اللى متمسكين فيها بالتراث والعادات والتقاليد اوى ومش واخدناها من أوربا.. ها هيواى هيواى؟! قولت اسال عم دُودل أو ست ويكى "دلع ويكيبيديا".. قوم الاقى ايه بقى؟ النيش ده اسم طريق ف المغرب.. طريق يعنى تراب وزلط ورمل وطوب والحاجات دى.. اجيبها شمال اجيبها يمين برضه مش لقيت حاجة.. كان فاضل شوية والست ويكى تلطم منى ومن اللى بدور عليه.. طيب ياجماعة ما هو الموضوع مطلعش حيوى اهو ولا مذكور في أي حتة.. لو كانت الحالة تسمح كانت سافرت بنفسى دورت في الرسومات المصرية القديمة يمكن الاقى ملكة من الملكات ماسكة بنتها من ايديها ونازلين يشتروا الصينى اللى هتكسروا على دماغ عريسها.. اصل ادينى عقلك يعنى الست من دول تروح تشترى صينى معدى ال 50 ألف وطقم شربات وطقم شاى وطقم زبادى وطقم شوربة وطقم للجيلى اوعى تنسى طقم الجيلى وكأسات من كل شكل ولون.. وماركات بقى يابانى والمانى وصينى وكابوكاى كمان لو عايز.. اه والله زى ما بقولك كده.. والمشكلة الكبيرة بقى أن المطبخ فيه الحاجات دى بس الحاجات اللى العروسة هتستعملها طبعا غير اللى ف النيش !! وتيجى تعترضى يا اوختى وتسألى الست الحاجة.." طيب لزمته ايه بس كل الصينى ده وانا اصلا مش هحتاجه " تبصلك كده من تحت ل فوق وتحسى انك عملتى كارثة كونية لمجرد ابداءك الرأى في حاجة هتكون ف شقتك انتى أساسا.. المهم بعد النظرات والغمزات ومش مانع من القرصات من تحت لتحت ترد عليكى وتقولك "انتى عايزة عماتك وخالاتك ياكلوا وشى يقولوا معرفتش اجهز بنتى زى بناتهم وحماتك تشمت فيكى.. اما انت بنت زبالة صحيح" طبعا الشتيمة بتكون من نوع تانى بس ده حفاظا على الاداب العامة. وكمان فيه مسلسل طويل عريض لسه بييجى لحد دلوقتى كان بيناقش أزمة الجواز والعرسان.. ايوة بتاع هند صبرى علا عبد الصبور.. مفيش ولا حلقة تطرقوا لحوار النيش ده ليه بقى الناس عاملاها أزمة ليه ها ليه؟! طيب تانى بالعقل انتى كواحدة داخلة على جواز في ايامنا المنيلة بستين نيلة، مش أولى تشترى حاجة تنفعك حاجة تستعمليها مش حاجة هتورثيها اصلا ل بناتك أو هتستعمليها يوم ما ييجى عريس للمحروسة بنتك.. طيب افرضى مخلفتيش بنات هتعملى ايه انا ساعتها؟! مهما تقولى وتعيدى ف الكلام ده والادلة والحجج والبراهين الواضحة وضوح الشمس ف كبد السماء أن النيش مالهوش أي ستين لزمة.. الامهات دماغها اتربست على كده قفلت معاها أن الجوازة مش هتمشى من غير نيش سواء ام العروسة أو ام العريس ! فيعنى في الأول وفي الآخر سواء كنتِ مثقفة ولا جاهلة بنت فلاح ولا بنت وزير لا مفر ولا مهرب من النيش والصينى اللى الناس هتيجى بيتك تشوفه وتتفرج عليه وتمدحه قدامك وتلعن فيه وفيكى من وراكى وتخرج تقول " مسم (مصمصة شفايف) شوفى الولية جايبة ل بنتها 20 طقم شاى بس.. مش مكسوفة من نفسها والنبى.. يالا دع الخلق للخالق" ايموشن ياواد يامؤمن:D انا عن نفسى وكحل جذرى للمشكلة من أساسها قررت ارضى جميع الاطراف وسوف اقوم بتأجير نيش ب محتوياته واحتفظ به ف شقتى لحد ما هوجة عرابى اللى بتيجى تزور العروسة أول شهر دى تختفى من حياتى ارجع النيش واعيش حياة طبيعية خالية من أي زيادات.. بدل النيش هنعمل مكتبة ولكن هذه قصة أخرى