عمرك سطحت على القطر ؟ لو الإجابة ( لأ ) طيب عمرك شوفت ناس بتسطح على القطر ؟ لو الإجابة برضه ( لأ ) أنا بقى شوفت و انا صغيرة لما باسافر كنت باشوف ناس راكبة فوق سطح القطر و سألت والدي هي الناس دي ليه مش بتركب جوة القطر ؟
قاللي إن اللي بيسطح على القطر إما إنه عامل غلبان أو مجند طفحان أو موظف مرتبه خلصان ... ووقتها فهمت إن التسطيح على القطر مش هواية و لا هو من قبيل المغامرة .. دي ناس ظروفها عاملة عليها مؤامرة .. التسطيح على القطر هو عين الفقر .. لكن بالرغم إن غالبية الشعب بيتعرضوا لهذه المؤامرة و معظمهم تحت خط الفقر ما فكرناش في يوم إننا ساعات بنشترك في المؤامرة و بنزود فقرنا بإدينا .. لسه فيه عادات و تقاليد عايشة فينا ما عادتش تناسب عصرنا و لا دخلنا و زمان المثل قالنا ( على قد لحافنا نمد رجلينا )
عارفة إن المغريات حوالينا كتيير واردات الصين سيطرت على التفكير و الإعلانات بتطاردنا في الشوارع و البيوت حتى في أحلامنا فوق السرير .. لو بنتك عروسة بتجهزها يا ويلك يا سواد ليلك .. المدام طبعاً عاوزة لبنتها أفخر جهاز تخليك تلعن اليوم إللي جالها فيه عريس يطلبها للجواز .. المدام غاوية فشخرة و بنتها مش أقل من بنات العيلة و الجيران و هاتك يا صرف و منظرة .. داخلة في 10 جمعيات و انت داخل و انت خارج هاااااات و هاااااات سجاد ستاير نجف بطاطين ملايات أطقم حلل و صيني و كوبايات ...... إلخ ده لو كان له آخر !!!!!!! من كل صنف أربع و خمس حاجات يمكن العروسة ما تلحقش تستعملها لحد الممات ... أما العريس يااااااا عيني عليه حفلة في الخطوبة و الحنة و الفرح في أكبر قاعات ..... مهر غالي و شبكة ذوقها عالي ،و بدلة سودة شيك بس للأسف جيبها خالي ،و شكليات و مفاخرة و تعالي ،و بكدة بقت عاداتنا و تقاليدنا في الجواز تعجيييييز نفسي نتخلص منها بليييييز ..
و همسة عتاب في ودن كل ست مصرية نفسي تتخلي عن جملة ( إشمعنى فلانة عندها و أنا لازم يبقى عندي زيها ) و تدخل سباق مع جارتها و زميلتها و بنت خالها و عمتها و تتملا الشقة باللي له لازمة و اللي مالوش و تضيع فيه فلوسها و في تنضيفه وقتها...
بجد منهى السطحية في التفكير يا كل راجل و كل ست يا كل شاب و كل بنت
ليه ما بنسألش نفسنا قبل ما نشتري إحنا بنشتري ليه ؟ هو إحنا فعلاً محتاجين إللي بنشتريه ؟ هو ضروري و لا كماليات و نوع من أنواع الترف ؟ يا ترى إللي هانشتريه معانا تمنه و لا هانستلف ؟ و قبل ما تيجي في الخية رجلنا أتمنى نشغل عقلنا و نراعي ظروفنا و دخلنا قبل ما سطحية الأفكار تخلينا نركب فوق سطح القطار ...
