"السيسي" يضرب بقوة من قنا.. ويُكلف الجيش بسحب أراضي وضع اليد.. ويؤكد: مصر مش طابونة

وجه الرئيس عبد الفتاح السيسي، عدد من الرسائل الهامة لمجلس الوزراء، والشعب المصري كافة، خلال احتفالية افتتاح عدد من المشروعات التنموية في محافظة قنا بحضوره، وعدد من الوزراء وكبار رجال الدولة والقوات المسلحة.

الشكر للإمارات
وجه الرئيس عبد الفتاح السيسي، الشكر لدولة الإمارات العربية المتحدة على ما قدمته وتقدمه لمصر، قائلًا: "تحية وتقدير لأشقائنا في دولة الإمارات، لأن مشروع ال25 شونة ضمن البرنامج الذي مولته الإمارات عقب ثورة 30 يونيو".

التوعية
وأكد السيسي، أن الهدف من عقد اللقاءات توعية الشعب المصري، متابعًا؛ " الهدف من اللقاءات إننا نقول للمصريين إحنا فين، لما أقول النهارده بستورد 10 مليون طن ورغيف العيش بيتكلف كذا، بإجمالى من 300 ل400 مليون رغيف، يعرف إذا كانت حكومة بلده واقفه جنب شعبها ولاّ لأ، وحريصة عليه ولّا لأ، والهدف من هذا اللقاء هو بناء وعى حقيقى بحجم تحدياتنا، وعاوز المواطن وهو قاعد فى بيته يعرف الحكاية ماشية إزاي، ويبقى قلبه معايا زي ما أنا قلبي عليه".

تفسير الوضع الاقتصادي
وقال الرئيس، إن "الإصلاح الاقتصادي كان ضروريًا علشان يخلى قيمة الجنيه قيمة حقيقة لقدراتنا الاقتصادية، والتي يترتب عليها إن منتجاتنا اللى ما كانتش منافسة للأسعار العالمية نتيجة الدعم الخفى وغير المباشر لسعر الدولار، ومن ثم كنا ندعم كل المحاصيل بشكل غير مباشر، ولكن بهذه الطريقة أصبح المزارع المصرى منافسًا للسعر الحقيقى للجنيه، والدولة كانت تدعم سعر الجنيه، وهذا وضع اقتصادي خطير، كان ها ياخدنا لمشكلة كبيرة، إن ما كناش بالفعل خدنا لمشكلة كبيرة".

غضب
وفي هذا الصدد، أبدى "السيسي"، غضبه من ظاهرة وضع اليد على الأراضى المستصلحة، قائلًا: "إحنا مع الاستثمار وتسهيل العمل لكل من يرغب في الاستثمار، وبنحاول ننظم العمل كدولة، ولكن وضع اليد على الأراضي غير مقبول ولن نقبله".

تحذير
وحذر "السيسي"، واضعى اليد على أراضي الدولة، قائلًا: "أنا بصراحة زعلان قوى، إن حد ياخد أراضي مصر وناس مش لاقية تاكل، وناس تمد إيديها ب10 آلاف فدان، و20 ألف فدان ياخدوهم ويقولوا دول بتوعى، والله العظيم ولا فدان واحد".

توجيهات
ووجه "السيسي"، حديثه للجيش ووزارة الداخلية، قائلًا؛ "بكلف الجيش ووزارة الداخلية، اللي زارع أرضه يقنن وضعه ويدفع دلوقتى، واللي مش زارع، الأرض ترجع فورا، وتنضم لشركة الريف المصري لإعادة توزيعها على المواطنين".

تكليف
هذا وكلف الرئيس، القوات المسلحة والشرطة بإنهاء هذه الظاهرة بحلول نهاية مايو الجاري، مشددًا على أنه ليس مقبول في مصر، ومحدش يمد إيده ويقول الأرض دى بتاعتى ودى بتاعة مصر، ومش من حقى أديها لك، والكلام ده غير مقبول في أي حتة في مصر، ومحدش ياخد حاجة مش بتاعته، هي مش طابونة اللي عايز حاجة ياخدها".

وتابع السيسي؛ "اللي يتكلم على المحكمة على طول، والكلام ده آخر الشهر، آخد تمام باستعادة الأراضي بالكامل".

سرعة التنفيذ
وهنا، طالب الرئيس، الدكتور هشام عرفات، وزير النقل والمواصلات، بسرعة إنهاء 3 محاور يتم تنفيذها على النيل، لتسهيل حركة المواطنين، قائلًا: "كل لما تخلصوا بدري بتفيدوا الناس، وكل لما بخلص المحاور اللى زي كده برحم الناس".

توضيح
وفيما يخص الجدل المثار حول رفع سعر تذكرة السكك الحديدية، أوضح "السيسي"، "المشكلة أن المسئول يتحدث دون أن يعلن الحاجة هتتكلف كام وهنجيب منين.. ونسيب الناس تتفرج علينا ولما نقول هنزود التذكرة جنيه يقولك أنا غلبان مش قادر، طيب أن كمان غلبان، عاوزين البلد تتصلح وتطلع وتبقى دولة والمواطنين يحسوا بتنمية حقيقة!"، متابعًا؛ "لو تركنا تطوير البنية التحتية فهذا سيتسبب في العديد من المشكلات والحوادث والخدمات غير المضبوطة".

وطالب "السيسي"، وزير النقل، الكشف عن الدخل السنوي للسكة الحديد، قائلاً:" دخل السكة الحديد كام يافندم في السنة؟، ليرد الوزير :"الفرق فظيع".. فالتشغيل يصل ل 4 و5 مليار، بينما لا تتجاوز الإيرادات 2 مليار جنيه".