"الفجر" تنشر قصة "حبيبة" قبل تعذيبها وحرقها بمياه النار في البحيرة (صور)

استطاعت بوابة "الفجر" الوصول لقصة الطفلة "حبيبة" ابنة قرية كوم البركة التابعة لمركز كفرالدوار بالبحيرة، وذلك قبل قيام خالتها بتعذيبها وحرقها بمياه النار وقص شعرها.
البداية ترجع لشهر أكتوبر الماضي، عندما عثر الأهالي علي طلفة لا تعرف سوي اسمها "حبيبة عيد السيد" ناحية كوبري سيدي غازي بكفرالدوار.
يروي "علاء صباح" أحد شباب كفرالدوار، تفاصيل أكثر عن قصة "حبيبة" قائلا: لقيت ناس متجمعين وملمومين علي طفلة، سألتها أسمك أيه قالتلي حبيبه عيد السيد، منين قالت مش عارفه، المهم قولت للي متجمعين عليها واحد يخدها يروح يوديها النقطه يسلمها، فكلهم رفضوا، فأخدت البنت روحت للنقطه سلمتها، ومشيت والعصر لقيت النقطه بعته ليا بتقولي عايزينك روحت ليهم قالولي لازم تعمل محضر بالطفلة، قولت ليهم ماشي اعملوا محضر، وروحت جيبت ليها سندوتشات كبدة وقالتلي عايزة عليها كاتشب، وكان دمها خفيف خالص، وقالت ليا دا بياع فقري وقعدنا نضحك.
وأضاف "صباح" قائلا: أخدت البنت وروحت بيها المركز أعمل محضر، وهناك سألوها شوية أسئلة ماعرفوش منها غير اسمها "حبيبة عيد السيد" وانها مش عارفه اي حاجه تانيه، المهم قالت ليا يا عمو علاء انا مش عاوزه اروح لخالتي عشان بتلسعني بالسجاير في جسمي، وبتسخن معلقه وتحرقني في جسمي، وقالت ليا خدني معاك مع عيالك ومش هعمل شقاوه، وكان واضح من كلامها إنها من المدن مش من الفلاحين، المهم اتعرضت معاها على النيابة، وحكيت الموضوع كله من الأول، وتم إخلاء سبيلي وإيداع البنت في دور رعايه وعمل نشره عنها حتي يتم التعرف علي ذويها.
واستطرد "صباح" قائلا: نزلت من النيابة للمركز قالولي لازم نعمل محضر تاني عشان نقفل المحضر الأولاني ونكتب فيه الاجراءات اللي أصدرتها النيابة، وجنبي البنت عماله تعيط وتقولي ياعمو علاء خدني معاك مع عيالك وانا مش هعمل شقاوه وانا عمال اقولها عشان تروحي لبابا وماما قالت ليا ماما ماتت وبابا سبنا لخالتي ومنعرفش هو فين ومشفنهوش من زمان خالص وخالتي بتعذبني علي طول، وكانت الصدمه بعد ما خلصت المحضر المركز قالي سيب البنت في الحجز البنت قالت ليا هتسبني ياعمو علاء وقعدت تعيط وانا اقسم بالله هعيط عليها ومش بإيدي حاجه أعملها.
واختتم "صباح" حديثه قائلا: طلعت من المركز لقيت واحده ست داخله المركز بتقولي هو انت اللي لقيت "حبيبه" قولتها انتي خالتها قالت اه، المهم دخلت للمركز تاني وخالتها مضت علي محضر برعايتها، وجيت قدام خالتها قولتلها هو انتي بتلسعيها بسجاير جات بصه لحبيبه حته بصه البنت قالت ليها أنا مقولتش حاجه لعمو علاء.
كانت قد تمكنت مباحث كفر الدوار، بمحافظة البحيرة، من ضبط السيدة المتورطة في تعذيب نجلة شقيقتها، بعدما اكتشف الأهالي الواقعة، واقتحموا المنزل لتخليص الطفلة، ونقلت الإسعاف الطفلة إلى مستشفى كفر الدوار.
واقتحم أهالي قرية كوم البركة، بمركز كفر الدوار بمحافظة البحيرة، أحد المنازل بعد سماع "صراخ" منبعث من داخله، ليكتشفوا وجود طفلة تعرضت لتعذيب على يد إحدى السيدات، وأشارت التحريات إلى أن السيدة تدعى "سناء م.ا" خالة الطفلة واستلمتها هي وشقيقها بموجب محضر تعهد رسمي بعد وفاة الأم وهرب الأب.
واعترفت "سناء" المتهمة بتعذيب نجلة شقيقتها الطفلة "حبيبة" وإخفاء أخيها الصغير بتفاصيل الواقعة أمام ضباط مباحث مركز شرطة كفر الدوار بمحافظة البحيرة، وقالت أنها قامت بذلك بسبب "شقاوتهما" وخروجهما دون علمها، وذلك وفقًا لما ذكره مصدر أمني، وأضاف المصدر أنها وضعت الطفل الصغير "شقيق حبيبة" أمام مسجد في محافظة المنوفية، ووضعه الأهالي بدار للأيتام.