"جرح تاني" لجيوب المصريين.. حتى الفينو "غلي" (تقرير)

أصحاب الأفران: ليس أمامنا سوى غلق المخابز
صاحب مطعم: "مجاتش على الساندويتشات.. واللي انتي عايزاه يا حكومة"
مواطنون: العيشة اسودت ومش هنشتري فينو تاني
واجه أصحاب المخابز السياحية أمرًا واقعًا بعد قرارات الحكومة الأخيرة بتعويم الجنيه ورفع أسعار الوقود، والتي جاءت بالتزامن مع رفع سعر القمح بالأسواق، ليصبحوا أمام ثلاثة سيناريوهات بحسب ما صرح بعضهم ل"الفجر" بغلق المخبز، أو بيع ثلاثة أرغفة بسعر جنيه بدلًا من 4، أو تصغير حجم الرغيف.
ومن جانب آخر عبر مواطنين عن غضبهم الشديد من ارتفاع سعر رغيف الفينو الذي يعتبرونه جزءً أساسيًا من وجبات أطفالهم، لافتين إلى أنهم وصلوا إلى مرحلة الاستغناء عن الطعام لعدم توافر أسعارها.
ونظراً لتفاقم تلك الأزمة قامت "الفجر" بجولة للتعرف على الأسعار الجديدة للخبز الفينو واستطلاع آراء المواطنين وأصحاب المخابز، الذين أكدوا أن الفينو أصبح رفاهية للأغنياء، وحلم عند الفقراء.
صاحب فرن يهرب من الغلاء بغلق المخبز
في البداية عبر عامر محمد، مالك أحد مخابز الفينو، عن استيائه من ارتفاع الأسعار الذي وصفه ب"المبالغ فيه" مشيراً إلى أنه قرر أن يغلق مخبزه بعد انتهاء كمية الدقيق والسكر الموجودة، بسبب عدم توافر السكر وارتفاع سعر الدقيق الذي وصل لضعف ثمنه وأصبح 4600 جنيه للطن، الذي يكفيه لعمل الفينو في فرنه لمدة أسبوع واحد.
وأضاف عامر، في حديثه ل"الفجر": "إحنا بقينا مش لاقيين سكر ولا دقيق عشان نخبز الفينو، في البداية كانت أزمتنا في السكر فعالجنا المشكلة بالعسل بالرغم من إنه بيطلع جودة وطعم الرغيف أقل إلا إنه كان حل مُرضي إلى حد ما، ولكن بعد السكر قابلتنا أزمة الدقيق اللي ارتفع سعره للضعف وبعدها سعر السولار فمقدمناش حاجة غير إننا نقفل الفرن عشان مش هيجبلي قد اللي هصرفه".
وتابع قائلاً: "كنا بندفع سعر الدقيق قبل ما السولار يغلى بس عشان منغليش على المواطن الغلبان بقينا نصغر حجم رغيف الفينو شكله صغير أه بس حل عشان منرفعش السعر والناس تضايق مننا زي ما إحنا بنغلي من قرارات الحكومة من رفع الأسعار".
صاحب مخبز: مش هدفع من جيبي
ومن ضمن الحلول التي ابتكرها أصحاب المخابز لمواجهة إرتفاع الأسعار كان حل الحاج "سعيد محمود" الذي قرر أن يرفع سعر رغيف الفينو مع كل إرتفاع في أي من المنتجات والأدوات التي يشتريها للمخبز، فيقول: "أنا كل ما أشتري حاجة غالية هغلي على الزبون..أصلي مش هدفع من جيبي، الأسعار نار عليا وعليهم وبصراحة الناس فاهمة مع أي قرار اقتصادي غريب تطلقه علينا الحكومة بيبقوا عارفين إن السعر هيغلى، أه الإقبال على الشراء قل بس ما اتعدمش زي أماكن تانية لإن الأكل من الضروريات للحياة".
وتابع: "عشان شهرة مخبزي فأنا ليا زباين خاصة بعملهم الرغيفين بجنيه، غير باقي الزباين اللي ببيعلهم ال3 أرغفة بجنيه، الفرق إني بظبطلهم الرغيف يعني بيكون كبير وحلو زي بتاع زمان ده غير دلوقتي اللي يتاكل على لقمتين، الحكومة هي اللي خلت الفرن بيميز بين زباينه فبقى عندنا فينو عادي وفينو وصايا وكله حسب مزاج الزبون ومقدرته المادية" .
أمهات تستبدّل الفينو بالعيش البلدي
ومن جانب المواطنين فقد قررت "أم عصام" تبديل الفينو بالعيش البلدي حتى تتفادى جزء بسيط على حد وصفها من الغلاء الذي يطحن الشعب، فقالت: "زمان كنا بنجيب الفينو ده كبير وحلو دلوقتي صغر يتاكل على مرة واحدة، يعني أنا ولادي الكبار لما كانوا في المدرسة كنت بعملهم سندوتشين بيكفيهم إنما دلوقتي ميكفيش ابني الصغير أربعة أرغفة فينو وللعلم فيه أفران بتبيع ال3 أرغفة بجنيه وفيه رغيفين دلوقتي بعد تعويم الجنيه".
واستكملت: "علشان العيشة السوداء اللي عيشنها قررت إني مش هشتري فينو تاني وهجبلهم عيش، حتى ابني اللي في المدرسة هعمله السندوتشات بالعيش مش بالفينو عشان أوفر في مصروف البيت اللي بينزف وعشان يشبع بدل اللقمة اللي مسمينها رغيف، الفينو بقا من الرفاهيات زي الفاكهة والحلويات ربنا يرحمنا ويا الأسعار ترخص يا نموت بقا عشان إحنا تعبنا بجد واتبهدلنا أوي".
ربة منزل: البلد هتوصلنا لفين؟
فيما قالت "مروة أحمد"، أم لثلاثة أطفال، إنها حاولت التغلب على ارتفاع الأسعار وصغر حجم رغيف الفينو بصنعه في المنزل ولكن التكلفة تخطت ثمن شرائه بكثير، موضحة أنها امتنعت فترة عن شرائه ثم عاودت الشراء مرة أخرى بسبب أطفالها.
وأضافت: "سعره زاد وحجمه صغر، يعني إحنا بندفع فلوس على الأرض بس إحنا مضطرين، قعدت فترة طويلة أحببهم في العيش البلدي وخليت الفينو بشتريه بس 3 أيام في الأسبوع عشان أقدر أعدل الميزانية".
وتابعت: "أوقات كتير مش بنلاقي ناكل عشان كده عودتهم على إن نص الأسبوع ساندوتشات عيش بلدي والنص التاني فينو، وحقيقي مش عارفة البلد هتوصلنا لإيه يعني رغبات أطفالنا مش بنحققها عشان الغلاء إرحمونا بقا، بقينا نبتكر ونجرب طرق إزاي نستغنى عن الأكلات عشان مش معانا نجيبها".
بائعو الساندويتشات: لو مغليناش الأسعار "هنشحت"
ولم تعاني الأمهات وحدهن من إرتفاع سعر رغيف الفينو بل يوجد الكثير من المطاعم التي تعتمد على الفينو في وجباتهم التي يعدوها للمواطنين، ومن بين تلك المطاعم والمحلات نجد محلات بيع ساندويتشات الكبدة، حيث يقول "مرسي محمد" صاحب محل، إنه قام برفع سعر الساندويتش جنيه بسبب غلاء الأسعار في السولار وفي الفينو وباقي الأطعمة.
واستكمل قائلاً: "أنا كنت ببيع ساندويتش الكبدة ب3 جنيه، دلوقتي ببيعه ب4 جنيه، وزودت الأسعار في كل الساندويتشات لأن كل حاجة بقيت غالية، الفينو غلي والكبدة والبصل والطماطم وحتى الأنابيب غليت كل حاجة بتغلى جت على ساندويتشاتنا، وبعدين إحنا لو مغليناش هنشحت وهندفع من جيبنا عشان نأكل الشعب، ده اللي انتي عاوزاه يا حكومة..عرفينا بس عشان نكون عاملين حسابنا إحنا إتخنقنا".