زوجة مالك عدلي: ضغطه عالٍ وممنوع يكلم حد أو حد يكلمه

قالت أسماء علي، زوجة المحامي مالك عدلي، إن زوجها مازال بحبس انفرادي، وإدارة السجن رافضة تدخله سرير أو بطانية، مؤكد أنه "قوي وصالب طول وقادر يضحك" على حد تعبيرها.
وكتبت "أسماء" علي حسابها بموقع التواصل الاجتماعي"فيسبوك"، اليوم الإثنين، "زرت مالك امبارح في السجن "طرة المزرعة"...هوا كويس وبيبعت سلام لكل اللي بيسأل عليه، عرفت أوصله شوية من الرسايل اللي بتجيلي بمساعدة Hazem Hassan وقليل من التظبيط، فرق دا معاه جدا، ممكن تكتبوا جوابات كمان وأحاول أبقي أوصلها كمان الفترة الجاية".
وتابعت: "وكمان عرفت أدخله امبارح كتب - لو حد عنده اقتراحات بكتب حجمها كبير عشان متخلصش بسرعة وتبقي لطيفة، الموقف جوا احتجازه زي ما هوا.. انهاردة اليوم ال 25 في زنزانة انفرادي مفيهاش غير بطانيتين، لغاية دلوقتي ادارة السجن رافضة تدخله سرير أو حتي بطانية، عرضنا اننا هنجيب الحاجات دي لو مش متوفرة والرد دايما "لسه ما جالناش أوامر".
وأضافت :"مالك ضغطه بقي عالي طول الوقت الطبيعي بقي 90/140 امبارح لسه أول مرة يسمحولي ادخله الدواء، قالي إنه تعب أربع مرات جدا والضغط علي أوي وجاله دكاترة السجن وزودوا جرعة الدوا اللي بياخدها، أنا قلقانة جدا من موضوع الضغط العالي دا خصوصا إنه ف زنزانة انفرادي وملوش حتي تريض، ممنوع يكلم حد أو حد يكلمه".
وواصلت :"وبالرغم من كل دا لسه قادر يضحك وقوي وصالب طوله وبيقول بالرغم من كل دا..هتفضل برضه ‫#تيران_وصنافير_مصرية‬".
وألقت قوات الأمن، في مطلع شهر مايو الجاري، القبض على المحامي والناشط الحقوقي مالك عدلي، مدير الوحدة القانونية بالمركز المصري للحقوق الاقتصادية والاجتماعية، وتم احتجازه بقسم شرطة المعادي وترحيله لقسم شرطة شبرا الخيمة.