تمثيلية ب «العقرب» أثناء زيارة مجلس حقوق الإنسان

ابنة متحدث الإخوان:

قالت مريم مراد علي، ابنة القيادي بحزب "الحرية والعدالة"، والمتحدث الرسمي للحزب مراد علي، والمسجون في قضية غرفة عمليات رابعة ‘ن إدارة سجن العقرب قامت بعمل مااسمته "تمثيلية" وسيناريو كاذب وذلك خلال زيارة المجلس القومي لحقوق الإنسان السجن أمس.
وأضافت مريم عبر صفحتها على موقع التواصل الاجتماعي فيس بوك :"زرنا الوالد أمبارح و الوضع كان غريب جداً ، الأكل بفضل الله دخل كله و الزيارة كانت ربع ساعة و سلمنا الحمد لله الحمد لله. و مكنش فيه طابور قدام البوابة و لا طابور قدام العقرب قالوا اللى أفراده كاملين *3 افراد بس* يدخل على طول...طب إيه الغريب فى كدة؟ كل ده غريب بالنسبة للعقرب مفيش أكل بيدخل كله و لا بنسلم و لا بتبقى أكتر من 5 دقايق و مفيش حاجة اسمها مفيش انتظار، الكلام ده كله كان تمثيل".
و تابعت :"فيه وفد من حقوق الإنسان كان جى فلبسوا البدل و رشوا المكان بالمية و بدأوها تمثيل و النفاق والسيناريو ده أتعاد 100 مرة في العقرب قبل كل زيارة وفد بيعملوا فيها الدنيا كيوت و يدخلولهم بطاطين و سراير لمدة يوم و يبدأوا يعملوا أى أكل و يوزعوه و أول ما الوفد يمشى يجردوا الزنازين و يرجعوا لقذارتهم و حملة التجويع و الموت البطئ بالذات إن كل سنة بعد 25 يناير بيبهدلوا المعتقلين جوة بطريقة لا توصف.".
وتابعت :" اللى يضحك إن حتى لو الوفد جيه و لقى الوضع اللى ماشى طول السنة من منع زيارات و أكل و أدوية..إلخ بردو هيألف فى تقريره إن كل حاجة ممتازة و احنا اللى بنطلع شكاوى كاذبة، بس زى ما تقولوا كدة الوفد و السجن بيحبوا يفبركوا على بعض أنا امثل ان الدنيا حلوة و انت تمثل إنك بتكتب تقرير محترم".
واختتمت :"انا مبكتبش الكلام ده عشانا، احنا و كل الأهالى عرفنا السيناريو خلاص ، انتو اللى محتاجين تسمعوه مننا قبل ما تسمعوه من تقرير ما يسمونه "حقوق إنسان" عشان بس متبدأوش تحسوا إن الوضع بيتحسن الوضع مبيتحسنش فى العقرب غير للعبة الداخلية مفبركاها. الكلام ده اتكتب من أهالى كتير و هيتكتب تانى و تالت و ألف عشان ديه وسيلة الضغط و نكون عملنا اللى علينا و مخذلناش حبايبنا اللى جوة ،احنا معتمدين على ربنا سبحانه ينقذهم بس لازم نأخذ بالأسباب و ننشر و نقدم طلبات و شكاوى و نستعين بناس ، بس فى الآخر بنلف و نرجع اننا مش عارفين نعتمد لا على منظمات و لا عليكم عشان آباءنا يعيشوا و نجيب حقهم".