أماكن للاحتفال برأس السنة 2016

كل سنة وانتوا طيبين وبنتمني لكم 2016 تكون سنة سعيدة جديدة عليكم يا رب إن شاء الله وتحققوا كل اللي بتتمنوه ونفسكم فيه.. كل واحد فينا أكيد دلوقتي بيخطط وبيشوف هيعمل ايه ويروح فين يوم رأس السنة 2016 .. النهرده جيبنلكم شوية أفكار واماكن ممكن تروحوها اليوم ده وتستمعوا.. يلا نبدأ؟
1- المسرحيات:
ممكن في اليوم ده تروح مسرحية مع الأصحاب أو الأهل, نقضي وقت ممتع ونضحك وديه خروجة عامة مش بنعملها كتير عشان كده هتبقي مميزة لو خرجناها في يوم زي ده..
– مسرح مصر: بطولة اشرف عبد الباقي وعاملين عرض خاص بمناسبة رأس السنة, مكانهم على مسرح مصر داخل فندق جراند نايل تاور بجاردن سيتي وسعره مش عالي ومعقول سعر التذاكر: 150,100,75 جنيه.
– تياترو مصر : بطولة أحمد فتحي – بيومي فؤاد – محمد لطفي اللي برده عاملين حفل استثنائي يوم الخميس الموافق 31 ديسمبر 2015 تحت مسمي ( تياترو نيو يير) وسيتم الاحتفال بالعام الجديد مع الجمهور وعاملين مفاجآت وهيقدموا مسرحيتين جداد في اليوم ده وسيكون موعد الحفل العاشرة مساءا مكانهم علي خشبة مسرح بجامعة مصر للعلوم والتكنولوجيا (ماست اوبرا هاوس) بالسادس من أكتوبر وسعر التذاكر: 100,75 جنيه.
2- المراكب العايمة:
ممكن كمان نستمتع بسهره علي المراكب العايمة في النيل, بيبقوا عاملين شو رقاصة وتنورة وباند وعشا واسعارهم بتتراوح من 300 ل 400 جنية, شوفوا الموضوع ده كان فيه كل أسامي المراكب النيلية
المطعم العائم ليدي ديانا : سعر الفرد حضور حفلة العشاء 400 جنيه
المطعم العائم نايل مكسيم: سعر الفرد حضور حفلة العشاء 400 جنيه
المطعم اندريا المعادي: سعر الفرد حضور حفلة العشاء 300 جنيه
الباخرة سكارابيه : سعر الفرد حضور حفلة العشاء 200 جنيه
3- الأوبرا:
هيقام فيها حفلة مخصوص لاستقبال السنة الجديدة, حفل العام الجديد – أوركسترا القاهرة السيمفونى من أعمال لعائلة شتراوس، فرانز ليهار، كالمان وآخرون أسعار التذاكر: 150 – 100 – 75.
4- بورتو كايرو مول:
عاملين نظام حلو قوي, مش بيبعوا تذاكر بس لو أي حد عمل تسوق في المول بتاعهم واشتري حاجات بإجمالي 400 جنية هياخد دعوة لحضور الحفلة, مع موسيقي الجاز المميزة ليحيي خليل وكمان الالعاب النارية مع أحمد عصام. الحفلة هتبدأ الساعة 8 بالليل.
5- سينما وعشا برة:
فكرة السينما عمرها مابتبطل أبدًا, لأن اهم حاجة فيه إحساس اللمة والأصحاب, ممكن بداية السنة تقهضوها في خروجة سينما ولو مكنتش جربتوا السينما ال 3D ده هتكون فرصة حلوة تجربوها وبعدها عشا برة البيت..
6- الاوتيلات:
كل الهوتيلات تقريبا عاملين حفلة في اليوم ده وبيبقوا عاملين بروجرام مختلف لانة بيعتمد علي نجم مشهور وبالتالي سعر التذاكر بيبقي اعلي شوية, يلا نشوف
– فورسيزونز نايل بلازا: حفل عمرو دياب في رأس السنة ب3800 جنيه
– إنتركونتيننتال سيتي ستارز: حفل سيضم "وائل جسار، ثريا، أمال ماهر، صافيناز، محمود الليثي، عمرو ربيع" وتتراوح أسعار التذاكر ما بين "1800، 2200، 2500، 2800، 3200، 3600 جنيه".
– فندق الفورسيزونز فيرست ريزيدنس بالجيزة: حفلة مميزة يحيها سامو زين، نيكول سابا، محمود الليثي، رامي صبري، دينا، صافينار، في تمام الساعة 10 مساءً حتى 5 صباحًا، احتفالا برأس السنة. أسعار التذاكر 1800، 2200، 2500، 2800، 3200، 3600 جنيه.
– فندق كونراد: يجمع بين آمال ماهر ورامي صبري ومحمود الليثي، إلى جانب الراقصتين الاستعراضيتين دينا وصافينازوتتراوح أسعار تذاكر الحفل بين 1400 – 1800 – 2200 – 2500 – 2800 – 3000 .
– فندق نايل ريتز كارلتون بكورنيش النيل: وائل جسار، كارمن سليمان، صافيناز، أحمد جمال، محمود الليثي, أسعار تذاكر الحفلة: "1800، 2200، 2500، 2800، 3200، 3600 جنيه".
7- عشا وحفلة مميزة في البيت:
اخر فكرة هي إننا نقضي الليلة ديه في الدفا سوا مع بعض في البيت ممكن نعظم الأصحاب والأهل, وممكن نعمل حفلة حلوة وبأمكنيات بسيطة, عشا مميز أو حتي دش بارتي , نجيب تورتة والحلويات اللي بنحبها, نجيب شجرة كريسماس ونزوقها, ونعلق زينة في البيت, نجيب طواقي ملونة .. نتفرج علي فيلم أو مسرحية وكل القنوات تقريبا هتعرض حاجات مميزة عشان ليلة راس السنة, وممكن نلعب ألعب زي secret santa, أو سانتا كلوز السري هشرحلكم اللعبة بتتلعب إزاي:
1- هنكتب أسامي كل اللي هيحضر الحفلة في ورق صغير وهنلفه عشان الاسامي متبانش.
2- كل واحد هيختار ورقة وده هيكون فيها اسم الشخص اللي هيجيبله هدية. يعني اللي هيسحب الورقة هيكون هو بابا نويل السري للشحص اللي اسمه مكتوب في الورقة.
3- هننزل أي سوبر ماركت أو مول قريب و كل واحد هيشتري هدية للشخص اللي طلعله اسمه في الورقة اللي سحبها, وتكون هدايا رمزية بس في نفس الوقت حاجة ممكن تعجب الشخص ده, سعر الهدية مثلا 20 أو 50 جنية. وهنكتب عليها اسم الشخص اللي جيبنهاله.
4- هنرجع ونحط الهدايا جنب الشجرة ونتصور معاها.
5- الساعة 12 بالليل كل واحد هيدور علي الهدية بتعته ويفتحها.
بكده نكون عملنا حفلة ولعبنا وانبسطنا وقضينا ليلة جميلة مميزة وكلها ذكريات.