"بلية" تكشف 9 معلومات عن فيلم "العفاريت"

نشرت هديل خيرالله، والتي جسدت دور الطفلة "بلية"، في فيلم "العفاريت"، مع الفنان عمرو دياب عام 1991ش، 9 معلومات عن الفيلم لم يعرفها الجمهور، وذلك عبر حسابها الشخصي على موقع التواصل الاجتماعي "فيسبوك".

وقالت "هديل": "للناس الي لسة مهتمة وبتسالني دايما, دول 9 معلومات عن فيلم العفاريت مش هاتعرفهم غير من بلية :

بيت عمرو دياب الي في الفيلم دا مش بيته ولا حاجة دا سويت في شيراتون الجزيرة

الفيلم اتصور في حوالي 6 شهور ما عدا مشهد واحد و توقف التصوير تماما لمدة 7 شهور و بعدين اتصور المشهد، و دا كان مشهد ميال ميال في الاستاد

اول مشهد اتصور في الفيلم لبلية كان اول مشهد لبلية مع الكتعة الي كان اوله قلم علي وشيي
حفلة عمرو دياب في الفيلم كانت حفلة ليه بجد

مشهد الشحاتة (الي بدون حوار) كانت الكاميرا مستخبية في عمارة و كنت بشحت بجد و لميت فلوس!!

المشهد بتاع "سرقت الخواجة كنتاكي" اتصور الساعة 3 صباحا و لوزة نامت في التصوير و اضطريت احفظ كلامها في ساعتها و الحوار تم كلة بيني و بين سقراط (لاحظ نومها في المشهد)

انا ما كنتش في الشوال لما سقراط شاله

دور بلية كان لبنت عمرها 8 سنوات و كان علي وشك اختيارها بالفعل و المخرج حسام الدين مصطفي لما شافني كنت اقل من 6 سنوات و اخترني

بمناسبة اني كنت 6 سنوات كنا بناكل في الاستراحة بين المشاهد و عمرو دياب قعد في الكرسي الي جمبي فا قلتلة "ماما لازم تقعد جنبي علشان تأكلني "