أحمد جمال ل"الفجر الفني": أنا مبقلدش حد.. ومش همثل أدوار تخدش حياء الجمهور

مطرب شاب في أواخر العشرينات بدأ من الصفر وأصبح من المواهب التي صعدت بسرعة الصاروخ، أجمع علي موهبته الكثير، و أشاد بموهبته نجوم الصف الأول، أبدع و تألق وأبكي ملايين، كانت أغنيته "أسالوا التاريخ من هى مصر" التى غناها فى برنامج "آراب أيدول" بمثابة جوزا سفر لقلوب المصرين وبوابته للشهرة.. أحمد جمال، نجم برنامج "أراب أيدول" للموسم قبل الماضى فتح قلبه فى حوار صريح ل"الفجر الفنى"، وكان هذا نص الحوار..،

-فى البداية حدثنا عن شعورك بالمشاركة فى مهرجان الموسيقى العربية لهذا العام؟
طبعا الحمد لله دي المشاركة الثانية علي التوالي، السنة اللي فاتت شاركت في المهرجان مع المطرب اللبناني مروان الخوري، والسنة دي مع الأستاذ الكبير وحبيب قلبي اللي أنا بعتبره نموذج ومثال للفنان العربي الأستاذ صابر الرباعي، وهو أمير الطرب العربي، وكانت دعوة المشاركة جاءت من الأستاذ صابر نفسه، ومن الأستاذ علي المولي مدير أعماله، والحقيقة أنا بقدملهم تحية كبيره جدا و شكر.

-هل حقق ألبومك الجديد "يالا نعيش" النجاح الذى توقعته؟
الحمد لله راضي عن كل الأغاني الموجودة في الألبوم، كل الأغاني الموجودة اتعملت و احنا بنستشير رأي بعض و بناخد رأي بعض، و عشان كده اتأخرنا، ولسه فيه عندنا أغاني حلوة مسمعتوهاش.

-لماذا لم تطرح أغنية "فى قلبى مكانك" ضمن أغانى الألبوم؟
مكانك في قلبي محطنهاش في الألبوم، بس هتبقي سينجل أو في الألبوم الجديد إن شاء الله.

-من المطرب الذى يحلم أحمد جمال بعمل "دويتو" غنائى معه؟
سؤال صعب، بس الأصوات الحلوة اللي أنا بحبها كتير، وأنا بفكر في فكره الديو بقالي فتره مع الأصوات اللي بحبها من زمان، وفيه ديو قريب إن شاء الله مع مغنية هنعلن عنه قريب.

-ماتعليقك على الاتهامات الموجهة لك بأنك تحاول تقليد النجم تامر حسنى؟
أنا مبقلدش حد، أنا كده بتعامل بطبيعتي، ولو صادف أي تصرف ليا بحد بتبقي صدفة.

- كغيرك من المطربين الذين خاضوا تجربة التمثيل.. متى ستتخذ تلك الخطوة؟
ناوي ان شاء الله، بس هي طبعا تجربه مقلقه لاني عمري مامثلت، ولا عمري فكرت أني أمثل، لكن مع الوقت بدأت أفكر في الموضوع، لاني شايفها ممكن تبقي إضافة، لكن لو حسيت إنه مش هيبقي إضافة ممكن أبعد، لكن احنا بنفكر في الموضوع و بنجهزله من دلوقتي.

- إذا هناك أعمال سينمائية أو درامية معروضة عليك الآن؟
فيه حاجات لكن رأي المجموعة "أهل الخبرة"، لما نعمل حاجه لازم نتدرب و نبقي جاهزين أكتر، ماينفعش لما نقول يلا نصور، ندخل نعمل فيلم و بطولة كمان، مش مستعجلين علي حاجه لازم ناخد وقتنا، ندرس الأول الموضوع عشان لما نعمل حاجة تعجب الناس.

- من منّ الممثلين الذين تحلم بالتمثيل أمامهم؟
لسه السؤال ده بدري عنه، مش مركز أوي في الموضوع ده، علي قد تركيزي فى الغناء.

- ما هى الخطوط الحمراء التى ستضعها فى أعمالك التمثيلية؟
مش هيبقي فيه غير في إطار المعقول و المضمون، لو دخلنا المجال هستمر فيه مش هعمل فيلم وأسيب التمثيل، و هحاول بقدر الإمكان واستطاعتي أن أقدم حاجه لجميع الفئات و الأعمار و طبقات المجتمع،و هلبي طلبات الجمهور في نوعية ادواري و مش هقدم أدوار خادشه للحياء ولا تسبب لأفكار سلبية.

-هل ستقدم حفلات غنائية احتفالا برأس العام الجديد؟
فيه أكتر من حاجه في القاهرة

- ماتعليقك على قضية الإعلامية ريهام سعيد وفتاة المول؟
مبحبش أتدخل في حاجات ملهاش علاقة بالمزيكا، بحاول أركز أكتر في شغلي، و كان عندي أكتر من 5 حفلات في أسبوع واحد،أخرها كانت في إسكندرية أمبارح، والنهاردة كان عندنا بروفه في الأوبرا، فمفيش وقت نركز في حاجه تانيه غير في الشغل.

-ماهى أمنيات أحمد جمال فى العام المقبل؟
بتمني ان ربنا يوفقنا و ينجحنا، ويكتبلنا حاجات حلوة تكون أحلي من السنه دي، وأتمني السنة الجاية تبقي خير و سلام ومنسمعش عن انفجارات ولا حوادث و ربنا يصلح أحوال البلد و الأمة العربية كلها، وربنا يبدأ بينا احنا الاول و كل حاجه تبقي مظبوطه طرق مواصلات صحة و تعليم وكل حاجه تتظبط دي أول حاجة، تاني حاجه يبقي عندنا جيل نسمعه شغلنا و نديله أفكارنا الايجابية جيل طالع يلقي حاجه حله عشان هو يشيل البلد، ويارب البلد يبقي فيها نجاحات للجميع.