أبوحفيظة يقدم دليل الثانوية العامة للطلاب وأولياء الأمور

طالب الإعلامى الساخر أكرم حسنى "ابوحفيظة" أولياء أمور طلاب الثانوية العامة بأن يتركوا لأبنائهم الحرية فى اختيار الكليات التى يتمنوا الالتحاق بها.

وأضاف أبوحفيظة خلال برنامج "أسعد الله مساءكم من جديد" على قناة mbc مصر قائلا: "رجاء شخصى لأولياء أمور طلبة الثانوية أنت شخص وأبنك شخص تانى له ميول غيرك، وأنت ليك أهداف وابنك ليه أهداف تانية، أبوس رجليك أعتق الواد وسيبو يفكر بطريقته هنبقى اوحش من كدة اية".

وتابع قائلا: "إليكم دليل أبوحفيظة للثانوية العامة بالنسبة للطلاب وأولياء الأمور أيضا كالتالى:

"من كتر الخوف حول الثانوية العامة طلعت حولها أساطير، إياك تصدق أبوك لما يقولك إنه كان بيذاكر على لمبة جاز، أو إن التعليم فى الصغر كالنقش على الحجر كلها أساطير وأقسم بالله أنا مش فاكر كلت إية امبارح، أما بالنسبة للواد اللى بيجيب 101% ويقول لك إنه مخدش دروس خصوصية، يعنى إية أمل كنت بتاخد إية فياجرا".

وأضاف قائلا: " لما يقولوا الامتحان للطالب المتوسط، السؤال هنا بتقسوه إزاى احنا عندنا إما طالب فاشل او طالب غبى مافيش متوسط، والأساطير اللى بتقولك بنت شاطرة وحلوة أولا البنات الحلوة كلها أدبى وروح هندسة القاهرة هتلاقى فرد الأمن بيقولك كل سنة وإنتى طيبة يا أنسة اسراء".

وتابع: "الأسطورة بتقول الخط الحلو عليه درجة والتسطير عليه درجة كله ده بلح، لو مافيش معلومات فى الورقة مش هتنجح".

أما بخصوص أولياء الأمور فى كلمتين لهم: "لازم تكون زكى وتمسك العصايا من النص، يعنى بلاش تهدد إبنك وتقول لو منجحتش مافيش مصيف، لإن إبنك عايز ينجح للنجاح مش عشان يلبس مايوة، وفى نفس الوقت متسيبش الحبل على الغارب علقي له صورة سلمان الحلبى فى الاوضه اللى بيلعب فيها بلاى ستاشن، أما بخصوص الأمهات متقوليش لابنك كفاية لعب وأدخل ذاكر وبلاش تشيلى البلاى ستاشن لأن هيلعب فى الموبيل ولو شلتيه هيلعب إكس او".

وأشار: "بلاش جملة تعالى أسمع لك، لإن دة بيخوف الواد لإنه بيبص على الخرطوم اللى فى إيدك اليمين، بلاش تقول لإبنك هات أشرح لك لما يقولك طيب اشرح لى قاعدة ارشميدس وتهرب وتقول ايوة يا حجة انا جاى اغير الامبوبة، وهيبقى شكلك وحش أوى".

وأكد قائلا: "بطالب كل أم ممكن متروحيش مع إبنك المدرسة إلا لو هتديلة ببرونة كراوية وتروحى، بلاش أول ما تطلع النتيجة تقول لا مشنتيجة إبنى وتزوقى الواد يعمل تظلم خلى الطابق مستور لإن لو عمل تظلم مش بعيد يرجعوا إبنك إعدادى ومعاه ملحق دراسات إجتماعية".

وتابع قائلا: "درجات الرأفة من الوزارة عشان الزواحف اللى زيك ينجحوا لكن مش 50 درجة دى لو كفالة يتيم مش هيدوهالك".

واستكمل حديثه: "الطلبة إنسى أى حاجة فى حياتك إنسى تروح الامتحان، لكن أوعى تنسى التمييز 80 متر و90 ديسيبل، أما بخصوص الكفيهات دى مش معمولة للمذاكرة، وياريت تطلب حاجة عشان مش فاتحين الواى فاى سبيل".

أما بالنسبة للكليات العسكرية مش يبقى طولك 140 سم وتروح لروبى لتأهيل الاقزام عشان يفردك، إنت تروح لفطاطرى عشان يفردك بالنشابة إنت أخرك تعدى من تحت عقب الباب ومحدش ياخد بالة".

وأضاف قائلا: "لو اختارت صيدلة باباك هيقولك هتبقى بياع، ولو قلت ادخل كلية طب بيطرى أمك تقولك هتبقى دكتور بهايم، ولو جوز خالتك الرخم قالك كلية طب تكلم خالتك فورا عشان تطلب الطلاق".