دليل "أبو حفيظة" للمرتبطين فى "عيد الحب"

كشف الإعلامى الساخر أكرم حسنى "سيد أبوحفيظة" عن دليل ابوحفيظة لعيد الحب حيث قال: "إزاى تعرفى شخصية حبيبك من طرقيته فى الفلانتين، لو جبلك دبدوب دة عبدالرحمن وبيفضل العمل الروتينى وغالبا بيتابع نشرة أخبار الساعة 9، واللى يقولك إية اللى ناقصك عشان اجبهولك فى الفلانتين دة يبقى بنى آدم طيب وأكيد كان بيقف مع مامته فى المطبخ، ويطلع لها البطاطس المقلية، ويرجح أنه الطالب اللى كان بيروح يسمح الصابورة، أما اللى يجبلك حاجة فى الأجهزة الكهربائية دة رجل عملى، ويفضل العمل بالتجارة ورقم الحظ له 9".
وأضاف خلال لقائه فى برنامج"أسعد الله مساءكم من جديد" على قناة mbc مصر قائلا: "لو جبلك هدية أكتر من 250 جنية متقبليهالش، لأنها مش هدية ولكن رشوة، أما اللى يقولك أنا مش بعترف بعيد الحب واللى بينى وبينك أكبر من الهدية، ده عقابة إنك تسبية يوم الفلانتين وتجوزى العريس اللى جايبة خالك وشغال فى السعودية".
وأشار قائلا: "لو حبيبتك فضلت تلف وتدور عشان تعرف الهدية بكام زى خالتها، عشان تحب تشترى الأرخص وهى نفس البنت اللى هتموت وتعرف مين اللى زار البروفيل بتاعها".
وأوضح قائلا: "عشان تتجنب الفركشة فى اليوم دة، متقولهاش عايزك تبقى أحلى واحدة إنهاردة، عشان اما هتروح مضروب او هتروح وهى معاك".
واستكمل حديثة: "ميبقاش مرتبك 1200 جنية وتقول هعيشك فى الجنة عشان لما تروح تشوف شقتك اللى فى الخصوص خدك هيزعل أوى من رد فعلها".
وتابع قائلا: "كل واحد لة طاقة، إستحمل لكن متستحملش لما ترسم عينيها زى نفرتيتى، وإنتى إستحملى أى حاجة إلا إنه يطول ضافر صابعة الصغير".