أبوحفيظة يقدم دليل لكشف الكذب و"الفتى"

أكد الإعلامى الساخر أكرم حسنى "أبوحفيظة" قائلا: "مشكلة كدبة إبريل، أول حاجة إنه يقولك إن لا يوجد سوى مفتى واحد فى مصر وفى الحقيقة هناك90 مفتى، وده يخلينا نرجع للطفولة، من أول الكلام عن الوطواط اللى بيلزق فى الوش ويطلع بالطبل البلدى، وماما اللى بتقولك رد ياحمادة على التليفون ولو طنط ميرفت سألت عليه قولها مش موجودة".
وأضاف خلال برنامج "أسعد الله مساءكم من جديد" على قناة mbc مصر قائلا: "وإن الليزر بيعمى، لغايت ماوصلنا للكدبة الكبيرة إن مرسى راجع".
كما قدم دليل "أبوحفيظة" لكشف الكدب والفتى وهو كالتالى:
"متصدقش الشخص اللى بيبدأ كلامه ب بيقولك وينهى ب معروفة، كلنا عارفين إن الكداب بيروح الجزيرة، متصدقش حد بيشوف القناة دى، او حد يقولك سمعت توفيق عكاشة وأحمد موسى، متصدقش إن الشوكولاتة تجلب السعادة، لإنك هتزعل لما تشوف كرشك مغطى رباط جزمتك، 80% من اللى ماشين فى الشارع ميعرفوش العنوان اللى بتسال عليه، ولا العنوان اللى رايحين له".
وتابع قائلا: "متصدقش الجمل التالية، حماتك بتحبك، خلى يا باشا، واللى يقولك انت منين ولما تقوله يقولك أجدع ناس، واللى يقولك معلش موبايلى صامت أو رقمك اتمسح من عندى، لازم تعرف إن اللى بيعمل كدة مش طايقك، فالحق نفسك واقطع علاقتك به".
وإستكمل حديثه قائلا: "بالنسبة للبنات، متصدقيش أى ولد يقولك ميهمنيش الشكل، وإفتحى أدامة صورة ل كيم كرادشيان وشوفى رد فعله، أما بخصوص الشباب، متصدقش أى بنت تقولك الماديات متفرقش معايا، وعش العصفورة يقضينا، وكمان متصدقش أى عيلة تقولك إحنا بنشترى راجل، يبقى رجع كوباية الشربات وأخرج بظهرك".
وأشار قائلا: "الناس اللى بتركب مواصلات، لما تشوف ميكروباص بينادى ويقول جيزة فاضى، دة كذب لإن لا الإتوببيس فاضى ولا الجيزة فاضية، متصدقش أى حد غير اللى يقولك معرفش".