بالفيديو.. عمرو سلامة يعتذر بسبب "مناخير" هند صبري: غرضي كان شريف!

أعلن السيناريست والمخرج عمرو سلامة، اعتذاره للفنانة هند صبري والمنتج محمد حفظي، بسبب إصراره على تركيب "مناخير" اصطناعية لهند صبري فى فيلم "أسماء" لتغيير ملامحها فى الفيلم، وذلك بعدما استعان بواحدة من أفضل خبراء المكياج في العالم تدعي Jo Allen، وهى التى غيرت شكل نيكول كيدمان في فيلم The Hours، ورغم ذلك لم تلفت "مناخير" هند صبري فى الفيلم الأنظار.

وأوضح "سلامة" عبر حسابه الشخصي على موقع التواصل الاجتماعى "فيسبوك" بعدما نشر فيديو يوضح ذلك قائلا :"في فيلم أسماء، كنت مصمم على إني أغير شكل الفنانة هند صبري اللي قامت بدور أسماء، الفيلم كان مستوحى من قصة سيدة حقيقية، وكانت الفكرة إني عايز أخلي الفيلم واقعي وحقيقي على قدر الإمكان، وعلشان كده كنت عايز أنسي الناس شوية إن ديه هند صبري اللي هم عارفينها".

وتابع :"كنت عايز من هندي صبري موهبتها الخارقة في التمثيل، من غير شكلها المعروف للجميع، وأنسي الناس إن ديه هند صبري اللي يعرفوها، وعلى هذا الأساس أصريت نجيب واحدة من أفضل خبراء المكياج في العالم، اسمها Jo Allen، هي اللي عملت أفلام زي Gladiator، وهي اللي غيرت شكل نيكول كيدمان في فيلم The Hours و غيرت شكل هابيير بارديم في فيلم Mar Adentro.

وأضاف :"طلبت منها نغير مناخير هند زي ما غيرت قبل كده مناخير نيكول كيدمان، وعملت كده فعلا، لكن الحقيقة إن تقريبا ماحدش خالص في الكوكب خد باله، وهند كانت بتقعد كل يوم قبل التصوير كذا ساعة علشان تعمل مكياج يخليها أكبر في السن وتحط المناخير".

وأختتم معتذراً :"طبعا لما ماحدش خد باله في الآخر، هند صبري ومحمد حفظي بالذات كانوا مش طايقني، طبعا مع اللوكيشن كله اللي كان قاعد مستني "المناخير"، وأنا بستغل هذه الفرصة السعيدة علشان أشكرهم، وأعتذرلهم نص الاعتذار، لإن غرضي كان شريف والمناخير هي اللي طلعت نص كم.
‎‎منشور‎ by Amr Salama.‎