بهجت قمر يعاتب ويلوم "الهضبة": أنا اللي كان أكتر واحد بيحبك

كعادته يعبر الشاعر الغنائي الكبير أيمن بهجت قمر، عن مشاعره الخاصة والتى يشارك بها جمهوره من خلال صفحته الشخصية بموقع التواصل الاجتماعي فيس بوك ، وهذه المرة هي الأكثر تأثيرا ل بهجت قمر، حيث وجه فيها رسالة عتاب ولوم للهضبة عمرو دياب، تحدث فيها بكل مشاعره من يقرأها فى البداية يشعر وكأنها رسالة عامة، ومن يتعمق فى قرأتها يتأكد انها موجه لعمرو دياب.
حيث كتب قمر: اكيد لما بتفارق حد كان فيه بينك وبينه عشره ساعات بيوحشك، ساعات بتحن لكل ايامك معاه وممكن كمان تندم على بعدك عنه وممكن تحس انك اتسرعت انك سيبته او خسرته وساعات برضه لما بتفكر بعقلك بتغضب وتلوم نفسك على ندمك ده خصوصاً لو موقفك ده نتيجته انك انت واللي حواليك والناس اللي منك هيحترموك وقبلهم انت هتحترم نفسك يمكن ماتحسش بنتيجة ده النهارده وتحسه بكره لكن اكيد مادام قدرت تدوس على نفسك وتاخد القرار يبقى لازم تستحمل كل المشاعر المختلفه والمتضاربه دي .
وتابع: اهم حاجه تخليك تحس ان اللي قدامك يستاهل تضحي عشانه او يستاهل انك تيجي على نفسك انك تحس انه يستاهل .. ويستاهل دي جواها معاني كتير يعني هو انك تبقى متأكد ان هو كمان مستعد يضحي وييجي على نفسه عشان خاطرك مايبقاش أناني ياخد اللي هو عايزه وبس ولما تحتاجله يسندك مش تلاقي نفسك مسنود ع الهوا .
وأضاف: اللي بينا كانت سنين وعشره.. علاقه الطرفين استفادوا منها واللي يشوف غير كده يبقى مجنون لإن الشواهد كلها بتقول كده وعايشه ومش هتموت واللي مش معترفين بده هما اول ناس بيصَّرخوا مع كل كلمه بتتنطق في الصفحات الخاصه بيا في تاريخ حكايتي معاه، كان ممكن يحل كل ده بكلمه، بمكالمه ،بموقف بلفتة اهتمام صغيره يمكن مالهاش وزن قصاد كفة اللي اتقدم واتعمل واتعاش وعاش ولمس قلوب كل اللي شهدوا ع الحكايه وحفظوا كل كلمه ف تفاصيلها .
وواصل: المواقف واضحه والبياع مابيفكرش هو بيبيع مين صاحبه ناسه مكانه نفسه حتى، بيع المهم انك تقبض تمن البيع ده وتحس بنشوه في السباق .. وتحس بالإنتصار في نهاية الصراع .. وتحس بالشبع مع انك مش جعان ..مع ان لانت محتاج تسابق لإنك سابق اساساً ولا محتاج تصارع حد .. انت محتاج تعيش وتستمتع وتحمد صديقي اللي راح .. ما انكرش بفتكرك .. مانكرش اني اوقات بغير عشان انا مش ملاك .
واختتم رسالته: ما انكرش اني بغضب وبثور وبندفع، لكن صدقني خلاص م الليلادي مش ندمان ..صديقي اللي كان طيب .. هلومك ليه و نقول ايه وللا يهمك ف ايه حتى .. عموماً هي أيام وبنعيشها و كل واحد يعمل اللي يريحه .. امضاء: اللي كان اكتر واحد بيحبك .