رسالة عتاب من أيمن بهجت قمر ل عمرو دياب

في رسالة فسرها الكثيرون على أنها رسالة عتاب من الشاعر أيمن بهجت قمر إلى النجم عمرو دياب، كتب الشاعر الغنائي على صفحته على الفيس بوك رسالة جاء فيها: (أكيد لما بتفارق حد كان فيه بينك وبينه عشرة ساعات بيوحشك.. ساعات بتحن لكل ايامك معاه وممكن كمان تندم على بعدك عنه وممكن تحس انك اتسرعت انك سيبته او خسرته وساعات برضه لما بتفكر بعقلك بتغضب وتلوم نفسك على ندمك ده خصوصاً لو موقفك ده نتيجته انك انت واللي حواليك والناس اللي منك هيحترموك وقبلهم انت هتحترم نفسك يمكن ما تحسش بنتيجة ده النهارده وتحسه بكره لكن اكيد مادام قدرت تدوس على نفسك وتاخد القرار يبقى لازم تستحمل كل المشاعر المختلفة والمتضاربة دي
اهم حاجه تخليك تحس ان اللي قدامك يستاهل تضحي عشانه او يستاهل انك تيجي على نفسك انك تحس انه يستاهل .. ويستاهل دي جواها معاني كتير يعني هو انك تبقى متأكد ان هو كمان مستعد يضحي وييجي على نفسه عشان خاطرك مايبقاش أناني ياخد اللي هو عايزه وبس ولما تحتاجله يسندك مش تلاقي نفسك مسنود ع الهوا.... اللي بينا كانت سنين وعشرة.. علاقة الطرفين استفادوا منها واللي يشوف غير كده يبقى مجنون لأن الشواهد كلها بتقول كده وعايشه ومش هتموت واللي مش معترفين بده هما اول ناس بيصَّرخوا مع كل كلمة بتتنطق في الصفحات الخاصة بيا في تاريخ حكايتي معاه.. كان ممكن يحل كل ده بكلمة، بمكالمة، بموقف بلفتة اهتمام صغيرة يمكن مالهاش وزن قصاد كفة اللي اتقدم واتعمل واتعاش وعاش ولمس قلوب كل اللي شهدوا ع الحكاية وحفظوا كل كلمه ف تفاصيلها.... المواقف واضحة والبياع مابيفكرش هو بيبيع مين صاحبه ناسه مكانه نفسه حتى بيع المهم انك تقبض تمن البيع ده وتحس بنشوة في السباق .. وتحس بالانتصار في نهاية الصراع .. وتحس بالشبع مع انك مش جعان ..مع ان لانت محتاج تسابق لأنك سابق أساساً ولا محتاج تصارع حد .. انت محتاج تعيش وتستمتع.
صديقي اللي راح .. ما انكرش بفتكرك .. مانكرش اني اوقات بغير عشان انا مش ملاك، ما انكرش اني بغضب وبثور وبندفع، لكن صدقني خلاص م الليلادي مش ندمان ..صديقي اللي كان طيب ..هلومك ليه ونقول ايه ولا يهمك ف ايه حتى .. عموماً هي أيام وبنعيشها، وكل واحد يعمل اللي يريحه).
وكتب أيمن بهجت قمر أسفل الرسالة " إمضاء.. اللي كان اكتر واحد بيحبك.. أيمن بهجت قمر.. وانزل بالشتائم".