مسامير نعش النساء

السلام عليكم يا نساء .. انا باعته اقول نصيحة لوجه الله تهم الأزواج وبخص بيها الستات .. انا مريت بمشاكل بيني وبين جوزي وصلت الى حد ماحدش هيتخيله بس مش ده موضوعنا , انا عايزة اركز على أسباب المشاكل الصادرة من الستات واللي اكتشفت بس بعد فوات الأوان انها السبب في خراب بيتي
.. .. عشان كدة حبيت اقدمها نصيحة يمكن تنفع حد أو تساهم في وقف المشاكل بين اي زوجين .. في البداية احب ابدأ كلامي بميزة معظم الرجالة اللي موجوده عندهم يمكن بالصدفة وهية ان الراجل بشكل عام صعب عليه يقرر الإنفصال وان موضوع الطلاق ده بيلجأ ليه لما الدنيا تخرب خالص , من هنا اقدر اقول ياريت نستثمر الحكاية دي ونراجع نفسنا في الطباع الشهيرة بين الستات اللي الراجل بيموت منها أو بيتغاظ منها أو بتفرسه وبتكرهه في مراته .. منها الندية والأسئلة المستمرة بمناسبة وبدون مناسبة .. الشك اللي ملوش تبرير ولا سبب حقيقي التدخل في أمور الزوج مع عائلته , البوح بأسرار بيتها براه والرغي في خصوصياتها مع جوزها حتى عن العلاقة الخاصة وده من اخطر ما يمكن وحرام أصلا .. المراقبة بوضوح أو حتى في الخباثة .. التلصص على مكالماته التلفونية حتى لو صاحبه اللي بيكلمه .. الزن الكتير والإصرار على تنفيذ الطلبات في الغير مناسب ماديا أو لظروف شغله أو حتى مزاجه .. التأنيب المستمر واللوم والمعايرة .. التشكيك في كلامه حتى وان صدق .. عدم الإهتمام لما الزوج يعمل حاجة حلوة أو يقدم هدية بسيطة أو الإعتراض على الهدية بعد تقديمها .. البص في حاجة غيرها .. كلمة إشمعنى اللي مش بتفارق لسانها حتى على أقرب الناس ليها .. التباهي باللي بيعمله والدها وإنكار كل اللي بيعمله جوزها سواء ليها او للولاد .. ده اللي فاكراه وحاضر في ذهني دلوقتي .. مش عايزة الستات تزعل مني لكن بجد الكلام ده حق وان مكنش بيحصل كله فهو على الأقل بيحصل معظمه انا مقصدش ان الرجالة ملايكة همة كمان ليهم حركات تفرس وأخطاء أحيانا لا تغتفر لكن انا بخص دلوقتي الستات .. ارجو يكون كلامي مفيد ويكون سبب في إعادة الحسابات مرة كمان وشكرا للأستاذة نيفين انها مستحملاني على طول الرسالة .
فضفضة
سيدتي الفاضلة أُكن لك كل التقدير ولا داعي للإعتذار لقد قدمتي نصيحة خالصة لوجه الله .. تشرفت بوجودك في فضفضة وتشرفت بك .