المزز بقوا حاجة صعبة خالص

مساء الخير .. عارف اني غلطان لكن مش لاقي حل .. انا متجوز من سنتين وبحب زوجتي وعندي طفل جميل ومراتي ست جميلة ونضيفة ورقيقة جدا واهلها ناس طيبين حتى لما بنختلف همة بييجو عليها علشاني , يعني مليش حجة .. لكن بخونها وكل ماجي ادخل في علاقة ضميري يأنبني لكن بدخل فيها بدون تفكير في العواقب
وفي مرة دخلت في علاقة وطلعت مجنونة الظاهر كدة حبتني والغباء اللي وقعت انا فيه اني عرفتها عنوان بيتي عشان لما تسافر مراتي استضيفها عندي .. المهم .. في يوم اختلفت مع الصديقة الجديدة وبنت المجنونة جاتلي البيت ومراتي موجودة وفضحتني في العمارة ومراتي عرفت التفاصيل وانا بعيش ايام سودة دلوقتي ما بين مراقبة مراتي لية وبين تأنيبها لية على طول وحركتي طبعا بقت في حدود المشاوير المشتركة ( العائلية ) , ده غير الشك اللي ماسكها في كل نفس .. م الآخر اتخنقت وبرغم كدة وانا في شغلي عيني بتزوغ .. طيب اعمل ايه ما المزز بصراحة بقو حاجة صعبة خالص اي راجل يحط نفسه مكاني ويقول رأيه , المهم انا دلوقتي عايز اخلص من تقفيلة مراتي علية ومش عارف ازاي ؟
ع . ك
فضفضة
أكيد مش المشكلة انك تخلص من تقفيلة مراتك علشان المشكلة في عينك انت اللي سايبة كل ميزات مراتك ومصرة تشوف غيرها .. انت حلك تستعين بالله كدة وتنوي نية خالصة لوجه الله انه يرحمك من اللي انت فيه طالما مراتك ست كاملة كدة .. غيرك يتمنى ربهعا يا راجل حرام عليك .. بعدين مراتك عمرها ما هتطمن إلا لما المجسات الحريمي الرباني تقول لها انك خلاص بطلت الجري ورا المزز على حد قولك , انا اللي عايزاك تقول لي سبب واحد بيخليك مشغول بالأخريات ؟ .. انا مستغرباك والله .. عارف لو كنت بتشتكي من زوجة مهملة .. غلسة .. معقدة .. مبهدلة .. شكلها وحش .. اي حاجة بس .. إحتمال كان ردي يبقى حاجة تانية لكن كلامك عن زوجتك خلاني مش لقيالك حل غير انك ترحم عنيك لوجه الله .. طيب اقولك .. جرب نفسك تحب مراتك بشكل مختلف .. جديد عليك .. أو حبها بالطريقة اللي بتعامل بيها الستات التانية شوف انت هتحس بإيه ورد علية .. بس بشرط .. خليك أمين في التجربة دي .. وربنا يهديك لنفسك وبيتك .