مروة كامل تكتب .. فهامة بالكهربة !

مرة واحد كان يتخانق مع مراتة وف عز الخناقة قالها(انتى بتحقدى عليا) وعلى فكرة كان بيقولها بجد مش هزار0
طبعا يا ابن المحظوظة لازم تحقد عليك وعلى كل الرجالة
اللى زيك0
- انت اخترت شغلك اللى انت فية و بتشتغل حاجة واحدة
لكن هى معندهاش اختيارات ف شغل البيت كلة اجبارى
ومتقدرش تشتغل حاجة وتسيب حاجة تانية0
-انت بتشتغل عدد ساعات محدد لكن هى بتشتغل طول النهار
و الليل ولما بتنام بتحلم بالشغل بتاع تانى يوم0
-انت بتاخد اجازة كل اسبوع لكن هى مفيش (يا اما ارحمينى)
دة حتى فالمصايف والرحلات المفروض انها اجازة هى بتشتغل طول الوقت انتم مستمتعين ومأجزين0
-انت بتاخد مرتب اخر كل شهر دة غير الحوافز و المكافئات و البدلات و المسكينة مفيش حتى ربع جنية مخروم0
-انت عندك تأمين صحى وهى يا عينى السكينة رايحة جاية
على ايديها زى ما يكون بتسلم عليها دة غير لاسعات الفرن
اللى عاملة زى الاختام على ايديها علشان متوهش منك دة
غير الصداع اللى بقى عامل زى عيل من عيالها مينفعش يعدى يوم من غير ما يزورها0
-انت داخل خارج مروق نفسك لكن هى لما تحب تخرج يا عند مامتها يا عند مامتك ولازم تسحب العيال معاها اللى بقوا عاملين زى ( الحسنة ف القفا)0
-انت لما بتزهق بتخرج هى لما بتزهق بتقلب الشقة عليها واطيها أشى مسح وأشى كنس وأشى غسيل علشان تنسى الزهق وكفاية ان عندك رفاهية النوم بالنهاريعنى بعد الغدا
بتدخل تأنتخ و تبرشط السرير لكن هى بتغفل ع الكنبة قدام
التلفزيون زى القطط0 انت بتخرج مع اصحابك لكن هى يا دوب لو عرفت تشيت مع اصحابها يبقى خير و بركة0
بمناسبة الاصحاب مرة كنت بكلم واحدة صحبتى ف التليفون وابنى كان عندة شهر لسة ومن قلة خروجى وصحبتى نفسها تشوفنى وانا مش عارفة انزل لقيتها بتقولى (أنا نفسى تسيبى البيض اللى انتى راقدة علية دة و تنزلى)شوفتوا الهنا اللى انا فية خلاص بقيت فرخة وبعد كدة قال صاحبنا بيقول على مراتة انها بتحقد علية بعد كل دة يا ابن المحظوظة ومش عاوزها تحقد عليك دة انت لو معرفتش هى بتحقد عليك لية تبقى مغيب ومش عايش معانا ع الأرض و لومش فاهم تبقى محتاج فهامة بالكهربة د ى لو محقدتش عليك تبقى مش طبيعية و محتاجة تتعالج ربنا يشفى الجميع0