عايز ناس أكتر تشوف فيديوهاتك علي يوتيوب؟ لو الناس مش لاقياك، مش هيعرفو لا يشوفو فيديوهاتك ولا يشتركو في القناة بتاعتك، و بالتالي ترتيبك في السيرش هيتأثر. هنتكلم في المقال ده علي أربع طرق سهلة عشان تعدل فيديوهاتك عشان تظهر أعلي في سيرش يوتيوب. ليه سيرش يوتيوب مهم؟ كل دقيقة في 100 ساعة يوتيوب جديدة بتترفع، 30 مليون واحد بيفتحو يوتيوب كل يوم، لو إنتا بتدور علي فيديو أول مكان عادة بتروح عليه بيبقي يوتيوب غير كده كمان، يوتيوب يعتبر تاني أكبر محرك بحث بعد جوجل. لو عرفت تستفيد من الترافيك و الشهرة اللي بيقدمها يوتيوب، هتقدر تتقدم في نتايج البحث بتاع يوتيوب. برضو عشان مشتغلكش: المنافسة شديدة، في ملايين الفيديوهات عالية الجودة و معمول فيها أوبتيمايزاشن حلو. زي جوجل، يوتيوب بيستخدم عوامل كتير عشان يحدد مين يظهر قبل مين في نتايج البحث. يوتيوب بيبص علي عدد مشاهدات الفيديو بتاعك، المدة اللي قعدها الناس علي الفيديو بتاعك و عدد الايكات و الكومنتات، وعشان تحسين جودة نتايج البحث يوتيوب بيبص علي عدد المشتركين في القناة بتاعتك، كام مرة الفيديو إتحط في بلاي ليست، كام مرة إتعمله فيفوريت وكام مرة إتحط علي ويبسايت. عشان توصل للأرقام العالية اللي بيعوزها يوتيوب هتحتاج تعمل أوبتيمايزاشن للمحتوي بتاعك عشان الناس تدوس عالفيديو بتاعك و تتفرج عليه، مش مجرد محتوي الفيديو نفسه، أنا بتكلم كمان علي الكيووردس، العنوان، الديسكريبشن و التاجز. دول خمس طرق تقدر بيهم تخلي فيديوهاتك جاهزة ومستعدة للظهور: 1- إختار كيووردس قوية إنتا عارف كويس قد إيه الكيووردس مهمة. إختيار الكيووردس ممكن يفرق بين إنك تظهر في الصفحة الأولي و الصفحة الخامسة في نتايج البحث، إنتا عارف كويس إن محدش بيوصل للصفحة الخامسة في البحث. مع إن يوتيوب يقدر يعمل حاجات كتير، إلا إنه لحد دلوقتي ميقدرش يشوف المحتوي الموجود في الفيديو بتاعك عشان يستخرج الكيووردس زي جوجل، عشان كده هتحتاج تزودهم بنفسك، لو عايز مساعدة في إختيار الكيووردس ممكن تستخدم يوتيوب كيوورد توول أو جوجل تريندس عشان تشوف أنهي كيووردس معليهاش منافسة كبيرة. الكيووردس بتاعتك هيا اللي بتساعد يوتيوب إنه يحدد إذا كان المحتوي بتاعك مرتبط بكلمات البحث و بالتالي يساعد الناس اللي بتدور علي كلمات إنتا حاطط عنها فيديوهات، حاول تستخدم الكيووردس في العنوان و الديسكريبشن و التاجز. كقاعدة عامة، إستخدم 10 تاجز يبقي فيهم تصنيف الفيديو، محتوي الفيديو، مكان التصوير وإسم أي حد موجود في الفيديو. 2- إستخدم الكيووردس في العنوان عنوان الفيديو لازم يوضح للمشاهدين إيه اللي موجود في الفيديو بالظبط، خلي بالك عشان الموضوع مش بالسهولة الي ممكن تكون متخيلها. عنوان الفيديو طويل؟ الناس هتزهق و تنفضلك، العنوان قصير؟ الناس مش هتعرف إذا كان ده اللي بيدورو عليه ولا لأ وبرضو هينفضولك. العنوان المثالي بيتحرك في 120 حرف يقولو للناس اللي بتدور هيتفرجو علي إيه لما يفتحو الفيديو، يعني مثلا فيديو عنوانه “قطتي” مش هيجذب إنتباه المشاهدين عشان ده عنوان مش مشوق، يعني العنوان ده لو إتعدل وبقا “قطتي بتحاول تاكل رباط الجزمة” هيبقي مشوق أكتر للي بيدور إنه يتفرج عليه، حاول برضو لو إنتا حاطط سلسلة من الفيديوهات إنك تحط عنوان السلسلة في الأول، يعني مثلا “قطتي: محاولة أكل رباط الجزمة”. 3- إستخدم الكيووردس في الديسكريبشن لما تيجي تكتب الديسكريبشن بتاع الفيديو إتحرك في الكيووردس بتاعتك براحتك، طول ما الديسكريبشن بتاعك طبيعي وواخد حريتك في الكتابة كل ما بقا أحسن، يعني لو إستخدمت الكيووردس بتاعتك كتير هتبقي بتعمل سبام وهيأثر عليك في ترتيبك في البحث، متنساس برضو لو عندك ويب سايت أو بلوج تبقي تحط اللينك بتاعه عشان جوجل بيعتبر اللينك في يوتيوب ديسكريبشن باك لينك و هيفيد الويب سايت بتاعك. متزودش عن 3 سطور ولو لازم تزود إبقا حط اللينكات في أول الديسكريبشن عشان دايماً تبقا ظاهرة. 4- إعمل صورة عمولة صورة الفيديو بتاعك هيا واجهته، دي أول حاجة المشاهدين بيشوفوها لما الفيديو بتاعك ييجي قدامهم في السيرش، لازم تبهرهم، ممكن كمان تستخدم صورة من نص الفيديو كنوع من أنواع التأكيد للناس اللي بتدور. خد وقتك عشان تعمل صورة عمولة جذّابة تظهر محتوي الفيديو بتاعك، لأفضل النتايج إستعمل ريزوليوشن 1280 * 720 بنسبة 16:9. الخلاصة: إختار الكيووردس الصح، إستخدمهم في العنوان، الديسكريبشن و التاجز و إعمل صورة عمولة للفيديو هتحس بفرق كبير في مشاهدات و نجاح فيديوهاتك. طبعاً مش محتاج أوصيك علي السياح اللي المفروض تعمله للفيديو بتاعك علي السوشيال ميديا عشان توصل لأكبر عدد ممكن من الناس، وياسلام لو الفيديو بتاعك وقع في إيد شخص أو صفحة مشهورة و نشرته تبقي طاقة القدر إتفتحتلك، ممكن تجرب تبعتلهم و تراسلهم بالمناسبة و متتكسفش. بعد كل ده كل اللي يبقي فاضلك إنك تعمل محتوي كويس يعجب الناس. جربت تعمل قبل كده أوبتيمايزاشن لليوتيوب؟ إيه أكتر حاجة إشتغلت معاك؟ لو عندك تجربة كويسة إكتبها في الكومنتات.