يعني ايه صدمه !

وبعد تلت ساعات من فكها , وهي عماله ت "تهته" وتاكل فى دوافرها لما خلاص دخلت علي كوعها , تصارحه انها مش هتقدر تكمل معاه
لان جايلها عريس وباباها موافق وسيباهم فى الصاغه بيجيبو الدبل عشان هيكتبو الكتاب بكره لانهم اوريدي هينزلوا يقدموا
لحماده ابنهم فى المدرسه السبت الجاي.
....

ولا لما يبقا صاحي نشيط افندي م الساعه خمسه الفجر , بيلبس وبيجري علي شغله , اللي طبعا بيوصلوا بعد ساعتين من شعلقته فى المترو , واول مايوصل يلاقي المدير بتاعه واقف مستنيه فى نص الشركه "رافع البنطلون لحد ودنه , ورافع معاه حاجبه الشمال , ويقوله بصوت واحد بالع كلب بديلو بأيموشن غسان مطر "تعالي ورايا ع المكتب"
ساعتها الزبون يلزق وراه , وهو بينفض جزمته بكف ايده , وبيدخل هدومه جوا البنطلون اللى اوريدي خرجت كلها برا اثناء مشوار كفاح اللي جابه للحاق بمترو الجيزه , وبالفعل يدخل المكتب ويقفل الباب وراه مع تأكده التام انه وش لابس "أبلكاشه" , يبص لمديره نظره هاديه فيها حب وشوق وترجي واشمئذاذ وضغينة فى نفس الوقت , ف يصدمه المدير ويصارحه ان الشركه مبقتش عايزاه , وانهم استغنوا عن خدماته!

....

ولا لما يبقا نادر لسه شاري الموبايل التاتش ابو تلت تلاف وشويه , ويبقا عمال يلعب فيه زي الاهبل طول الطريق , ويقرر فجأة
يقوم ينزل عشان وصل ,, يحطه الموبايل فى جيبه ويقوم جري وهو بيلطش فى الناس عشان يلحق ينط من باب العربيه اللي اوريدي
دقيقتين وهتوصل عين الصيره
وهوب ينزل يعدل هدومه وفجأة يحط ايده علي جيبه .. ميلاقيش الموبايل !


لا لا .. انتو فاهمين غلط .. دي صدمات عبيطه
تعالو بقا اعرفكو ع الصدمات
صدمات من النوع التقيل
الصدمه اللي تجيب "لامؤاخذه" انفجار فى الامعاء الدقيقه

وهي تتلخص فى شعورك النبيل لما تبقا في الشارع ومروح جري علي بيتكو , وانتا علي "اخرك" ونفسك تدخل الحمام
توصل لبيتك المصون وتجري ع الحمام وانتا بتخلع هدومك واول ماتاخد وضعك وتفتح الميا .. متلاقيش ميا
تفتح الباب وانتا بترفع البنطلون وبتزعق فى نفس الوقت .. الميا فييييييييييييين .. وطبعا نفسك متسمعش الاجابه اللى انتا اوريدي حاسسها

: اه .. الميا !! دي مقطوعه م الصبح وهتفضل كدا يومين


حاول ساعتها تفتكر حبيبك اللى سابك ولا شغلك اللى اداك استماره سته ولا تليفونك اللي اتقفش منك
هتلاقي انها كانت مواضيع تافهه جدا , بالنسبه لاحساسك بالحاجه الشرسه وقتها انك تولع فى البيت وتقتل امك وابوك بالجيران المحيطه وتسلم نفسك لاقرب قسم بوليس .. يكون فيه ميا :))