اتهامات زوجة

السلام عليكم جميعا
مشكلتي يمكن تكون مش كبيرة لكنها بتتسبب في مصايب بيني وبين زوجتي ، كل خلافتنا على أنها معترضة اني بنعكش الدنيا وأنا قاعد في البيت واني لما بدخل المطبخ لايمكن طبق أو معلقة تفلت من حوض الغسيل وطبعا الموضوع ده تحديدا بيجننها والحدوتة بتقلب تقطيم وتانيب وفي الآخر خناقة يسمعها الجيران ، ده غير الشرابات اللي عمرها ما بتلاقيها والصراحة انا بعترف انا صحيح مهمل وعشوائي في الأمور دي لكن لما كنت عايش مع أهلي ما كنتش بحس بالمأساة دي لان والدتي عمرها ما لامتني على حاجة كدة فاعتقدت ان اللي مراتي بتتكلم فيه خبل وعبط وابتديت اضايق واشيل منها بجد لان المفروض نظام البيت من اختصاصها .. اشمعنى والدتي كانت ست وأم جميلة بتقوم بشغل البيت في صمت وكمان مبتسمة ؟؟؟؟
مراتي كل شغلتها الصابونة اللي سبتها في المية فباشت وما بقتش تنفع أو الفوطة المرمية مبلولة بعد كل دش أو البيجامة المخرومة من طفية السجاير أو أدوات الحلاقة اللي بتلمها كل يوم في مكانها أو أو أو .. ومش بنخلص ومش عارف أعالج المواضيع دي .. مش هطول عليكم لكن حابب أقول من حاجات بسيطة فيه مشكلة وخناقة يوميا وفي اليوم كذا مشكلة .. لا انا هتغير ولا هية هتتغير .. لكن السؤال هنا .. هل ممكن فعلا الخلافات دي تقلب بمصيبة كبيرة والموضوع يوصل لطلاق ؟ لا قدر الله .
علي
[email protected]