بالأصول يا أستاذ

انا في حيرة كبيرة ، انا حبيت بنت وفضلنا نحب بعض سنين طويلة لكن من قريب ابتديت اميل لبنت تانية شدتني شخصيتها بحاجات كتيرة وبتهيالي كدة اني بحبها ومشكلتي اني مش عارف اعمل ايه ؟ أكمل مع حبيبة عمري ولا أكمل مع التانية ؟ وهل التانية دي حب حقيقي فعلا ولا عشان هية شخصيتها ملفتة بس ؟! ياريت تفيدوني وشكرا
الطاووووس

فضفضة
محررة الصفحة .. نيفين حجازي

أستاذ طاووووس .. اسمحلي أقول لك انك مش جاد أصلا في الحالتين .. وبتتلاعب بمشاعر بنات الناس .. لية عندك كام سؤال .. هوة انت ليه ما اتقدمتش لخطبة البنت الأولى مثلا ؟! وليه تسمح من الأول انك تربطها بيك المدة دي كلها ؟! على فكرة الحق مش عليك لواحدك .. الحق عليها هية كمان !! بعدين المفروض تقف قدام نفسك الأول وتحدد موقفك من الأولى بعدين تقرر هتعمل ايه مع البنت التانية ؟ يا أستاذي الفاضل سيادتك أكيد بتهزر وسلوكك خرج عن إطار الأصول من البداية اللي اعرفه ان الشاب الي ينوي على زواج بيختصر الطريق ويروح يتقدم .. ايه المشكلة في كدة ؟! والله اتفقوا خير وبركة .. كان غير كدة خير وبركة برضه .. شوف .. ما تستناش مني أدافع عن حاجة برة الأصول ده الخلاصة .. عموما .. ياريت لو انت إنسان أمين فعلا تحدد موقفك مع البنت الأولى .. لو حاسس أنها لا تصلح أو حتى تصلح بس انت بتماطل أرجوك تسيبها لإنسان يقدرها مع أنها تستاهل هية كمان اللي بيجرالها منك لانها ساهمت في إهدار حاجات كتير .. لكن هقول ايه !! ما خلاص .. المهم .. سيادتك تحدد من دلوقتي يا تسيبها تعيش حياتها بعيد عنك يا أما تتقدم لها بما يرضي الله والأصول أما عن البنت التانية فاعتقد ان ميلك ليها ده فراغة عين في الأغلب لان اللي بيحب فعلا مش هيميل لحد تاني بالسهولة دي خصوصا ان فيه عشرة سنين زي ما قلت .. إلا إذا علاقتك بالبنت الأولى تحولت الى اعتياد وانت اللي هتبقى حولتها لكدة .. أخيرا .. ده رأيي ويمكن حد يتفق معايا أو يختلف ده وارد وعموما التعليقات مفتوحة لكل الناس همة أكيد هيردوا عليك بحلول يمكن يكون عند حد فيهم رد افضل مني .. أرجوك راجع ضميرك.
[email protected]